Christina Ricci

Kristina Riççi (12 fevral 1980-ci il təvəllüdlü) amerikalı aktrisadır. O, qaranlıq tərəfləri olan qeyri-ənənəvi obrazları canlandırması ilə tanınır. Riççi "National Board of Review" mükafatının "Ən yaxşı ikinci plan aktrisası" və "Satellite" mükafatının "Ən yaxşı aktrisa" kateqoriyaları da daxil olmaqla bir sıra mükafatlara layiq görülüb, həmçinin "Qızıl Qlobus", "Praymtaym Emmi", "Ekran Aktyorları Gildiyası" və "Müstəqil Ruh" mükafatlarına namizəd olub. Riççi kino debütünü doqquz yaşında "Mermaids" (1990) filmində edib, ardınca "The Addams Family" (1991) və onun sikvelində canlandırdığı Uenzdey Addams rolu ilə məşhurlaşıb. Daha sonra "Casper" və "Now and Then" (hər ikisi 1995) filmlərindəki çıxışları ona "yeniyetmə ikonu" şöhrəti qazandırıb. 17 yaşında "The Ice Storm" (1997) filmi ilə yetkinlik dövrü rollarına keçid edib və bu, "Buffalo '66", "Pecker" və "The Opposite of Sex" (hamısı 1998) kimi filmlərdə rol almasına yol açıb. O, "Sleepy Hollow" (1999) və "Monster" (2003) filmlərindəki ifaları ilə rəğbət qazanıb. Onun digər işləri arasında "Fear and Loathing in Las Vegas" (1998), "Prozac Nation" (2001), "Pumpkin" (2002), "Anything Else" (2003), "Black Snake Moan" (2006), "Speed Racer" (2008) və "The Smurfs 2" (2013) var. Əsasən müstəqil layihələrdəki işləri ilə tanınmasına baxmayaraq, Riççi çoxsaylı kassa hitlərində də rol alıb – indiyədək onun filmləri 1,4 milyard ABŞ dollarından çox gəlir əldə edib. Televiziyada Riççi "Ally McBeal" (2002) serialının son mövsümündə Liza Bamp rolunu canlandırıb və 2006-cı ildə "Grey's Anatomy" serialındakı qonaq rolu ilə bəyənilib. O, həmçinin ABC-nin "Pan Am" (2011–12) serialında Meqqi Rayan obrazını canlandırıb, "The Lizzie Borden Chronicles" (2015) və "Z: The Beginning of Everything" (2017) seriallarının həm prodüseri olub, həm də baş rollarda çəkilib. Bir neçə animasiya filmində personajları səsləndirməklə yanaşı, Riççi "The Legend of Spyro: Dawn of the Dragon" və "Speed Racer: The Videogame" (hər ikisi 2008) videooyunlarında da səsləndirmə edib. 2010-cu ildə o, "Time Stands Still" tamaşası ilə Brodvey debütünü reallaşdırıb.