Claire Danes

Kler Ketrin Deyns (12 aprel 1979-cu il təvəllüdlü) amerikalı aktrisadır. O, üç "Praymtaym Emmi", dörd "Qızıl Qlobus" və iki "Ekran Aktyorları Gildiyası" mükafatı laureatıdır. 2012-ci ildə "Time" jurnalı onu dünyanın ən nüfuzlu 100 insanından biri elan etmiş, 2015-ci ildə isə o, Hollivud "Şöhrət Xiyabanı"nda ulduzla təltif edilmişdir. Deyns ilk dəfə 1994-cü ildə yayımlanan "My So-Called Life" yeniyetmə dram serialındakı Ancela Çeyz rolu ilə tanınmışdır. Bu rol ona "Qızıl Qlobus"un "Ən yaxşı aktrisa" mükafatını və "Praymtaym Emmi"nin "Dram serialında ən yaxşı baş rol aktrisası" nominasiyasını qazandırmışdır. O, elə həmin il "Little Women" (1994) filmi ilə kinodebütünü etmişdir. Onun rol aldığı digər filmlər arasında "Home for the Holidays" (1995), "Romeo + Juliet" (1996), "The Rainmaker" (1997), "Les Misérables" (1998), "Brokedown Palace" (1999), "Princess Mononoke" (1997) filminin 1999-cu il ingilisdilli dublyajı, "The Hours" (2002), "Terminator 3: Rise of the Machines" (2003), "Shopgirl" (2005), "Stardust" (2007) və "A Kid Like Jake" (2018) yer alır. 1998-2000-ci illərdə Yel Universitetində təhsil alan Deyns aktyorluq karyerasına qayıtmaq üçün təhsilini yarımçıq qoymuşdur. O, 2000-ci ildə "Off-Broadway" səhnəsində "The Vagina Monologues" tamaşasında çıxış etmiş, 2007-ci ildə isə "Pygmalion" tamaşasının yenidən səhnələşdirilməsində Eliza Dulittl rolunu oynayaraq Brodvey debütünü etmişdir. 2010-cu ildə o, böyük rəğbət qazanan "Temple Grandin" adlı HBO televiziya filmində Templ Qrendin obrazını canlandırmış və bu rola görə ikinci "Qızıl Qlobus"unu, həmçinin "Mini-serial və ya filmdə ən yaxşı baş rol aktrisası" kateqoriyasında ilk "Praymtaym Emmi" mükafatını qazanmışdır. 2011-2020-ci illərdə "Showtime" kanalının "Homeland" dram serialında Kerri Metison obrazını canlandıran aktrisa bu rola görə "Dram serialında ən yaxşı baş rol aktrisası" nominasiyasında iki "Praymtaym Emmi", "Dram janrında televiziya serialında ən yaxşı aktrisa" nominasiyasında iki "Qızıl Qlobus" və "Televiziya Tənqidçiləri Assosiasiyası"nın "Dram janrında fərdi nailiyyət" mükafatına layiq görülmüşdür.