Val Kilmer

Val Edward Kilmer 31 dekabr 1959-cu ildə Los-Anceles, Kaliforniyada dünyaya gəlib. Anası Gladys və aviasiya avadanlıqları distribütoru olan atası Eugene Kilmerin oğlu olan Val orta məktəb illərində Kevin Spacey ilə sinif yoldaşı olub. Hələ 17 yaşı olanda nüfuzlu Juilliard School-un dram fakültəsinə qəbul edilən dövrünün ən gənc tələbəsi kimi teatr təhsilinə başlayıb. Səhnə karyerasına "Hamlet" və "Orestes" kimi klassik əsərlərlə addım atan Kilmer kino dünyasına 1984-cü il istehsalı olan casusluq parodiyası "Top Secret!" ilə daxil olub. Elmi-fantastik komediya "Real Genius" (1985) ilə yüksəlişini davam etdirsə də, onu qlobal ulduza çevirən rol Tom Cruise ilə tərəf-müqabili olduğu "Top Gun" (1986) filmindəki soyuqqanlı pilot Tom "Iceman" Kazansky obrazı olub. 1990-cı illər Kilmerin karyerasının zirvəsi və ən məhsuldar dövrü idi. Oliver Stounun rejissoru olduğu "The Doors" (1991) filmində rok əfsanəsi Jim Morrisonu vokal hissələrini şəxsən ifa edəcək qədər qüsursuz şəkildə canlandırıb. Ardınca "Tombstone" (1993) filmində vərəm xəstəsi olan silahşor Doc Holliday performansı ilə vestern janrının ən unudulmaz obrazlarından birinə imza atıb. Bu uğurları Michael Mannin cinayət janrındakı şah əsəri "Büyük Hesaplaşma" (Heat) (1995) və Bruce Wayne obrazını təhvil aldığı kassa rekordçusu "Batman Daima" (Batman Forever) (1995) izləyib. Eyni dövrdə "Aziz" (The Saint) (1997) filmində müxtəlif görkəmlərə girən bir oğrunu canlandıraraq döyüş filmi ulduzu statusunu möhkəmləndirib və "Mısır Prensi" (The Prince of Egypt) (1998) animasiyasında Musanı səsləndirib. 2000-ci illərdə Shane Blackin qara komediyası "Kiss Kiss Bang Bang" (2005) filmindəki Gay Perry rolu ilə tənqidçilərdən tam qiymət alıb. Lakin 2010-cu illərin ortalarında qırtlaq xərçəngi diaqnozu qoyulan aktyor keçirdiyi traxeotomiya əməliyyatı səbəbindən səsini böyük ölçüdə itirib. Sənətə olan sevgisindən vaz keçməyən Kilmer 2021-ci ildə Kann Film Festivalında premyerası olan "Val" sənədli filmi ilə həyat mübarizəsini və karyerasını bütün çılpaqlığı ilə gözlər önünə sərib. 2022-ci ildə isə süni intellekt texnologiyası ilə səsi yenidən yaradılaraq "Top Gun: Maverick" filmində Iceman rolu ilə emosional bir geri dönüş edib və tamaşaçılara vida xarakterli bir performans təqdim edib. Val Kilmer 1 aprel 2025-ci ildə sətəlcəmlə bağlı ağırlaşmalar səbəbindən Los-Ancelesdə dünyasını dəyişib.