Ralph Fiennes

Ralph Nathaniel Twisleton-Wykeham-Fiennes 22 dekabr 1962-ci ildə İngiltərənin Suffolk qraflığının İpsviç şəhərində dünyaya gəlib. Fotoqraf ata və yazıçı ananın altı övladından böyüyü olan Fiennes sənət mühitində böyüyüb. Gənclik illərində rəssamlıq təhsili alsa da, teatra üz tutaraq nüfuzlu Kral Dramatik İncəsənət Akademiyasında (RADA) aktyorluq təhsili alıb. Məzun olduqdan sonra Royal Shakespeare Company-nin heyətinə qatılaraq klassik teatr səhnələrində özünü sübut edib. Kino karyerasına isə Emili Brontenin ölməz əsəri əsasında çəkilmiş "Uğultulu təpələr" (Wuthering Heights) (1992) filmində Hitkliff obrazını canlandıraraq başlayıb. Fiennesi dünya miqyaslı kino ulduzuna çevirən və ona ilk Oskar namizədliyini qazandıran əsas uğuru Stiven Spilberqin rejissoru olduğu 1993-cü il istehsalı "Şindlerin siyahısı" (Schindler's List) dramı ilə gəlib. Filmde canlandırdığı sadist nasist düşərgə komandiri Amon Göth performansı kino tarixinin ən təsirli mənfi obrazlarından biri hesab olunur. Bu böyük uğurdan sonra Entoni Minqellanın rejissoru olduğu və ən yaxşı film daxil olmaqla 9 Oskar qazanan "İngilis xəstə" (The English Patient) (1996) romantik müharibə dramında qraf Laslo Almaşi obrazına həyat verərək ikinci dəfə Oskara namizəd göstərilib və adını Hollivudun ən hörmətli aktyorları sırasına yazdırıb. O, bu dövrdə "Viktorina şousu" (Quiz Show) (1994) və "Qəribə günlər" (Strange Days) (1995) kimi əhəmiyyətli layihələrdə də baş rolları ifa edib. 2000-ci illərdə karyerasını müxtəlif janrlarla zənginləşdirməyə davam edən Fiennes Devid Kronenberqin "Hörümçək" (Spider) (2002) psixoloji trilleri, "Qırmızı əjdaha" (Red Dragon) (2002) və "Daimi bağban" (The Constant Gardener) (2005) kimi filmlərdə rol alıb. Lakin onu müasir populyar mədəniyyətin ən ikonik fiqurlarından birinə çevirən əsas rolu "Harri Potter və Alov Qədəhi" (2005) filmi ilə daxil olduğu fantastik dünyada canlandırdığı qaranlıq sehrbaz Lord Voldemort olub. Seriyanın sonrakı filmlərində də ("Harri Potter və Simurq Ordeni" 2007, "Harri Potter və Ölüm Hədiyyələri: 1-ci hissə" 2010, "2-ci hissə" 2011) bu obrazı canlandıraraq yaddaşlara həkk olunub. Karyerasının yetkinlik dövründə komediya və döyüş janrlarında da dahiliyini nümayiş etdirib. Ues Andersonun kult filmi "Qrand Budapeşt oteli" (The Grand Budapest Hotel) (2014) filmindəki xarizmatik konsyerj Qustav H. performansı böyük bəyəni toplayıb. Bundan başqa, Ceyms Bond seriyasına "Skayfol" (Skyfall) (2012) ilə daxil olaraq Cudi Dençdən sonra yeni "M" (Qaret Mallori) obrazını öz üzərinə götürüb və bu rolu "Spektr" (2015) və "Ölmək vaxtı deyil" (No Time to Die) (2021) filmlərində davam etdirib. Rejissor kürsüsünə də əyləşərək "Koriolan" (Coriolanus) (2011) və "Görünməz qadın" (The Invisible Woman) (2013) filmlərini həm ekranlaşdırıb, həm də baş rollarını ifa edib. "Menyu" (The Menu) (2022) filmindəki Şef Slovik rolu ilə triller janrındakı ustalığını bir daha sübut edən aktyor, yaxın dövrdə "Konklav" (Conclave) (2024) və "Qayıdış" (The Return) (2024) kimi güclü dramlarla kino səyahətini davam etdirir.