Miles Millar

Miles Millar (1967-ci il təvəllüdlü) avstraliyalı-britaniyalı ssenarist, şouranner, prodüser, yaradıcı, tərtibatçı və rejissordur. O, daha çox Tim Burtonun rəhbərlik etdiyi və "Addams ailəsi"nin spin-offu olan Netflix-in 2022-ci il istehsalı "Wednesday" adlı komediya-qorxu janrındakı serialın yaradıcısı kimi tanınır. Bu serial Netflix tarixində ən çox baxılan ingilisdilli serial rekorduna sahibdir. Millar uzun müddətdir birlikdə çalışdığı ssenarist və prodüser tərəfdaşı Alfred Gough ilə birlikdə "The WB/The CW" kanalının "Supermen"in gəncliyindən bəhs edən "Smallville" adlı macəra serialını, AMC-nin 2015-ci il istehsalı olan "vuxia" üslublu distopik "Into the Badlands" serialını və MTV-nin 2016-cı il istehsalı olan, Terry Brooks-un "The Sword of Shannara Trilogy" kitablar seriyasına əsaslanan epik fentezi janrındakı "The Shannara Chronicles" serialını yaradıb, prodüserliyini və ssenaristliyini edib. O, həmçinin Tom Deyin "Shanghai Noon" və onun davamı olan "Shanghai Knights", Sem Reyminin "Spider-Man 2", Rob Koenin "The Mummy: Tomb of the Dragon Emperor" adlı blokbaster macəra filmlərinin, eləcə də 1988-ci ilin kult filminin davamı olan Tim Burtonun "Beetlejuice Beetlejuice" filminin ssenarisini həmmüəllif kimi yazıb. O, ssenarist və prodüser tərəfdaşı Alfred Gough ilə USC Kinematoqrafiya İncəsənəti Məktəbində tanış olduqdan sonra birlikdə işləyirlər.