Holly Hunter

Holli Hanter (20 mart 1958-ci il təvəllüdlü) amerikalı aktrisadır. Corciya ştatının Konyers şəhərində anadan olan aktrisa ilk dəfə beşinci sinifdə oxuyarkən tamaşada Helen Keller rolunu oynamış, daha sonra Rokdeyl Kaunti Liseyində səhnələşdirilən "Oklahoma!", "Man of La Mancha" və "Fiddler on the Roof" tamaşalarında baş rolları ifa etmişdir. Pitsburqda Karnegi Mellon Universitetini dram ixtisası üzrə bitirmiş və yerli teatrlarda çıxış etmişdir. Daha sonra Frensis Makdormand ilə birlikdə Nyu-Yorka köçərək Brodvey karyerasına başlamışdır. 1981-ci ildə çəkilmiş "The Burning" qorxu filmində rol aldıqdan bir il sonra Los-Ancelesə köçmüş, burada müxtəlif teatr və televiziya filmlərində ikinci dərəcəli rollar oynamışdır. Ardınca "Raising Arizona" (1987) filmində baş rola çəkilmiş və "Broadcast News" (1987) filmindəki roluna görə "Oskar" mükafatına namizəd göstərilmişdir. O, sonralar "Roe vs. Wade" (1989) və "The Positively True Adventures of the Alleged Texas Cheerleader-Murdering Mom" (1993) televiziya filmlərindəki ifasına görə iki dəfə "Praymtaym Emmi" mükafatına layiq görülmüşdür. "The Piano" (1993) filmində lal şotlandiyalı qadın obrazına görə "Ən yaxşı qadın roluna görə" Oskar mükafatını qazanmışdır. Daha sonra "The Firm" (1993) və "Thirteen" (2003) filmlərinə görə daha iki dəfə Oskar mükafatına namizəd göstərilmişdir. Onun qazandığı digər mühüm mükafatlar arasında AACTA mükafatı, "Gümüş Ayı", BAFTA mükafatı, Kann Film Festivalı mükafatı və "Qızıl Qlobus" yer alır.