Bridget Moynahan

Ketrin Bricet Moynahan (28 aprel 1971-ci il təvəllüdlü, boyu 1,77 m), daha çox Bricet Moynahan kimi tanınan, amerikalı model və aktrisadır. 1989-cu ildə Lonqmedou orta məktəbini bitirdikdən sonra Moynahan modellik karyerasına başlayıb. O, bir modellik agentliyi ilə müqavilə bağlayıb və bu, onun univermaq kataloqlarında, eləcə də məşhur jurnalların üz qabığında görünməsinə yol açıb. Televiziya reklamlarında çəkildikdən sonra peşəsini dəyişmək üçün aktyorluq dərsləri almağa başlayıb. Moynahan televiziya debütünü 1999-cu ildə "Sex and the City" komediya serialında qonaq aktrisa kimi edib və sonradan burada Nataşa obrazı ilə daimi rollardan birini canlandırıb. Növbəti il o, "Coyote Ugly" filmindəki rolu ilə ilk dəfə tammetrajlı filmdə çəkilib. Daha sonra "Serendipity" (2001) filmində ikinci dərəcəli rola dəvət alıb. Moynahan "The Sum of All Fears" (2002) döyüş filmi, "The Recruit" (2003) casus trilleri, "I, Robot" (2004) elmi-fantastik filmi və "Lord of War" (2005) siyasi trilleri də daxil olmaqla, müxtəlif janrlı filmlərdə rol alıb. Kino fəaliyyətindən kənarda Moynahan 2006-cı ilin sentyabrında premyerası baş tutan ABC telekanalının "Six Degrees" serialında çəkilib. Lakin şou uğurlu olmayıb və bir mövsümdən sonra yayımı dayandırılıb. O vaxtdan bəri Moynahan kinoya qayıdaraq aşağı büdcəli filmlərdə rol alıb. Moynahan Elizabet Allenin 2010-cu ilin iyulunda ekranlara çıxan "Ramona and Beezus" filmi üzərində işini tamamlayıb. Televiziyaya qayıdan Moynahan hazırda CBS telekanalının "Blue Bloods" dramında baş rollardan birini ifa edir. Şəxsi həyatına gəldikdə, Moynahan ssenarist Skott Rozenberqlə üç illik münasibətdə olub. Daha sonra 2004-2006-cı illərdə NFL oyunçusu Tom Bredi ilə diqqət mərkəzində olan bir münasibət yaşayıb. 2007-ci ilin avqustunda o, Bredidən olan oğlu Con Edvard Toması dünyaya gətirib.