Al Pacino

Alfredo James Pacino 25 aprel 1940-cı ildə Nyu-Yorkun Şərqi Harlem bölgəsində anadan olub. O, italyan-amerikan cütlüyü Rose Gerardi və Salvatore Pacinonun dördüncü övladı idi. Pacino 2 yaşında olarkən valideynləri boşanıb. Anası ilə birlikdə İtaliyanın Siciliya bölgəsindəki Corleone şəhərindən köçüb Bronksa yerləşən qohumları Kate və James Gerardinin yanına köçüb. Pacinonun atası da İtaliyanın Siciliya bölgəsindəki San Fratello şəhərindən idi və boşandıqdan sonra sığorta şirkətində işləmək üçün Kaliforniyanın Covina şəhərinə köçmüşdü. Gənclik illərində dostları ona “Sonny” və ya “Aktyor” deyə müraciət edirdilər. O, peşəkar beysbolçu olmaq istəyirdi. Herman Riddler adına orta məktəbdə oxusa da, ingilis dili istisna olmaqla digər dərslərdən kəsildiyi üçün tezliklə məktəbdən qovuldu. Daha sonra İfaçılıq Sənətləri Liseyinə (High School of Performing Arts) daxil oldu. Anası bu qərarına qarşı çıxdı və aralarında mübahisə yarandı. Bu mübahisədən sonra o, evi tərk etdi. Aktyorluq dərslərinin xərcini ödəmək üçün poçtalyon, ofisiant, poçt məmuru və təmizlikçi kimi aşağı maaşlı işlərdə çalışdı. Bir müddət "Commentary" jurnalında da işləyib. 9 yaşında siqaret və alkoqoldan istifadə etməyə başladı. 13 yaşında marixuana sınadı, lakin digər ağır narkotiklərdən uzaq durdu. Ən yaxın dostları yüksək dozada narkotik qəbul etdikləri üçün 19 və 30 yaşlarında vəfat etdilər. Bronksda böyümək onu zaman-zaman davalara və məktəbdə daim problem yaradan bir uşağa çevirdi. Nyu-Yorkda bəzi teatr tamaşalarında rol aldı, lakin "Actors Studio" məktəbinə qəbul olmaq istəsə də, rədd cavabı aldı. Daha sonra "HB Studio"ya qoşuldu. Burada gələcəkdə müəllimi və ən yaxın dostu olacaq Charlie Laughton ilə tanış oldu. Bu dövrdə tez-tez işsiz qaldı; küçələrdə, teatrlarda və bəzən dostlarının evində gecələdi. 1962-ci ildə 43 yaşlı anası vəfat etdi. Elə həmin il babası James də dünyasını dəyişdi. Al Pacino bu dövrü həyatının ən ağır illəri kimi xatırlayır. Sonralar verdiyi müsahibələrdən birində o, bu barədə belə demişdi: “22 yaşım var idi və mənə ən çox təsir edən iki insanı itirmişdim. Bu, həyatımı dəyişməyimə səbəb oldu”. "HB Studio"da dörd il çalışdıqdan sonra peşəkar aktyorların, teatr rejissorlarının və dramaturqların üzv olduğu "Actors Studio"ya seçildi. Sonradan "The Godfather: Part II" və "...And Justice For All" filmlərində birlikdə rol alacağı Lee Strasberg ilə "metod aktyorluğu" (method acting) üzərində işlədi. Daha sonra nəşr olunan bioqrafik kitabında Grobelə Lee Strasbergin və "Actors Studio"nun karyerasına necə təsir etdiyini belə izah edib: “Actors Studio mənim üçün çox şey ifadə edir. Düşünürəm ki, Lee Strasberg layiq olduğu qiyməti almır. Bütün bu aktyorluq işlərini buraxmağı düşündüyüm vaxtlarda o, əlimdən tutdu və məni bura gətirdi. Bu, həyatımda qeyd olunmağa dəyər bir dönüş nöqtəsi idi”. Başqa bir müsahibəsində isə bunları söyləyib: “Lee Strasberg ilə işləmək çox həyəcanverici idi, çünki o, çox maraqlı bir insan idi. Bir səhnə və ya bir obraz haqqında dediyi şərhləri başqa heç kimdən eşidə bilməzdiniz. O, bu sənətə və aktyorlarına həqiqətən dəyər verən bir insan idi”.