1500-cü illərin Venesiyasında gənc Bassanio gözəllər gözəli Portianın qəlbini fəth etməyə qərarlıdır. Lakin çoxsaylı talibləri olan bu xanımın ürəyini qazanmaq üçün çıxacağı səyahətə pul lazımdır. O, tacir dostu Antonionun yanına gedir. Lakin xeyirxah Antonio bütün sərvətini dənizdəki gəmilərinə yatırıb. Dostuna kömək etməyə çalışan Antonio, faizsiz borc verdiyi üçün nifrətini qazandığı yəhudi sələmçi Şaylokdan borc istəməyə məcbur olur. İntiqam vaxtının çatdığını anlayan Şaylok, bəlkə də həyatında ilk dəfə faizsiz borc verməyə razılaşır, lakin bir şərtlə: əgər pul vaxtında qaytarılmazsa, hər gecikmə üçün Antonionun bədənindən bir parça ət kəsmək hüququna sahib olacaq.