Jodie Foster

Jodie Foster (d. 19 noyabr 1962), amerikalı kino aktrisası, rejissor və prodüserdir. Əsl adı Alicia Christian Fosterdir. 3 yaşında aktyorluqla tanış olub. Robert De Niro ilə çəkildiyi "Taksi Şoferi" və Anthony Hopkins ilə baş rollarını bölüşdüyü "Quzuların səssizliyi" filmləri ilə tanınır. 3 yaşından 8 yaşına qədər təxminən 40-a yaxın reklam filmində rol alaraq mühüm təcrübə qazanıb. Ardınca televiziya seriallarında rol alan Foster, ilk kino filmi olan "Napoleon və Samantha"nı 1972-ci ildə çəkib. Sonrakı 5 il ərzində aralarında "Tom Sawyer" və "Çılğın Cümə"nin də olduğu 10-dan çox filmdə rol alıb. Hələ ilk illərdən aktyorluğu ilə tənqidçilərin diqqətini çəkməyi bacarıb. Hələ 14 yaşında olarkən, Martin Scorsese-nin "Taksi Şoferi" filmində Robert De Niro ilə birlikdə oynadığı uşaq fahişə rolu ona "Ən yaxşı ikinci plan qadın roluna görə" Akademiya mükafatı namizədliyi qazandırıb. Bu film onun geniş kütlələr tərəfindən tanınmasına səbəb olub. Əvvəlki uşaq ulduzlar Shirley Temple və Tatum O'Neal-dan fərqli olaraq, Fosterin yetkin rollara keçidi olduqca uğurlu olub. İlk "Ən yaxşı qadın roluna görə" Akademiya mükafatını təcavüz qurbanı olan bir qadını canlandırdığı 1988-ci il istehsalı "The Accused" filmi ilə alıb. İkincisini isə Anthony Hopkins ilə baş rollarını bölüşdüyü, 1991-ci il istehsalı "Quzuların səssizliyi" filmi ilə qazanıb. "Quzuların səssizliyi", Fosterin karyerasında bir dönüş nöqtəsi olub. Yazıçı Thomas Harrisin romanı əsasında çəkilən və Fosterin baş rollarını Hannibal Lecter obrazını canlandıran Anthony Hopkins ilə bölüşdüyü bu film, ona təkcə "Ən yaxşı qadın roluna görə" Oskar mükafatını qazandırmaqla qalmayıb, həm də filmin prodüserlərinə "Ən yaxşı film" Oskarını qazandırıb və Foster üçün Hollivudun qapılarını sonuna qədər açan bir mişar daşı rolunu oynayıb. Foster ilk rejissorluq təcrübəsini 1991-ci il istehsalı "Little Man Tate" filmi ilə yaşayıb. Dahi bir uşaq və anası ətrafında cərəyan edən hekayənin nəql olunduğu filmi Foster həm rejissor kimi idarə edib, həm də baş rolda oynayıb. 1992-ci ildə özünün prodüser şirkəti olan "Egg Pictures"i qurub. 1994-cü ildə həm prodüseri olduğu, həm də rol aldığı "Nell" filmində Şimali Kaliforniya meşələrində insanlardan təcrid olunmuş şəkildə yaşayan və sonda sivilizasiyaya qayıtmaq məcburiyyətində qalan Nell obrazını canlandırıb. 1997-ci ildə Matthew Mcconaughey ilə baş rollarını bölüşdüyü, Carl Saganın romanı əsasında çəkilən "Mesaj" filmində dünya xarici varlıqların araşdırıldığı bir layihədə çalışan bir alim qadını canlandırıb. Bu filmləri 2002-ci il istehsalı David Fincher filmi "Panik Otağı" və 2005-ci il istehsalı "Uçuş Planı" izləyib. Bu filmlərdən sonra gələn müsbət rəylər, Fosterin adının bir çox jurnal və tənqidçi tərəfindən bütün zamanların ən yaxşı aktrisaları siyahısına əlavə edilməsinə səbəb olub. Fosterin sonrakı filmi olan "İçəridəki Adam" adlı filmdə isə o, baş rolları Denzel Washington və Clive Owen ilə bölüşüb. 70-ci "Qızıl Qlobus" mükafatlandırma mərasimində homoseksual olduğunu açıqlayan Foster, ailəsinin və yaxın çevrəsinin bu vəziyyəti daha əvvəldən bildiyini də dilə gətirib. Jodie Fosterin Charles və Christopher adında iki övladı var. Homoseksual olan Jodie Foster 2014-cü ildə Alexandra Hedison ilə evlənib.