Zəki və kinik bir insan olan George Milton ilə adına zidd olaraq iri və çox güclü, lakin əqli cəhətdən zəif olan Lennie Small, Böyük Depressiya dövründə fermadan fermaya dolaşaraq iş axtaran iki köçəri torpaq işçisidir. Kaliforniyadakı Salinas Vadisində, Soledad yaxınlığındakı bir fermada iş tapır və pul yığmaq üçün çalışmağa başlayırlar. Onların özlərinə məxsus bir parça torpaq alıb orada məskunlaşmaq kimi ortaq bir xəyalları var. Lennie bu xəyalı George-a dəfələrlə danışdırır və ən çox da bəsləyib sığallaya biləcəyi yumşaq dovşanlarla bağlı hissəni sevir. George isə Lennie-nin bu obsesiyasını onu qorumaq üçün istifadə edir və başını bəlaya salsa, dovşanlara baxmasına icazə verməyəcəyini deyir. İkili, daha əvvəl çalışdıqları Weed-dəki fermadan, Lennie-nin yumşaq şeylərə toxunmaq obsesiyası üzündən gənc bir qadının paltarına toxunmağa cəhd etməsi səbəbiylə qaçmalı olublar.