Guy Ritchie

Qay Stüart Riçi (10 sentyabr 1968-ci il təvəllüdlü) ingilis kinorejissoru, prodüser, yazıçı və iş adamıdır. Riçi 15 yaşında məktəbi tərk edib və televiziya reklamlarını çəkməyə başlamazdan əvvəl kino sənayesində aşağı vəzifələrdə çalışıb. 1995-ci ildə "The Hard Case" adlı qısametrajlı filmi çəkib, ardınca isə ilk tammetrajlı rejissorluq təcrübəsi olan "Lock, Stock and Two Smoking Barrels" (1998) cinayət komediyasını ekranlaşdırıb. Qısa müddət sonra tənqidçilər tərəfindən bəyənilən və kommersiya uğuru qazanan ikinci filmi "Snatch" (2000) ilə tanınıb. "Snatch"dən sonra Riçi 2000-2008-ci illərdə evli olduğu Madonnanın baş rolda çəkildiyi, tənqidçilərin mənfi rəylərinə baxmayaraq kassada uğur qazanan "Swept Away" (2002) filminə rejissorluq edib. Daha sonra o, izləyicilər tərəfindən qarışıq rəylər alan "Revolver" (2005) və "RocknRolla" (2008) filmlərini çəkib. 2009 və 2011-ci illərdə kassada rekord qıran "Sherlock Holmes" və onun davamı olan "Sherlock Holmes: A Game of Shadows" filmlərinin rejissoru olub. Rejissorluq etdiyi digər filmlər sırasına 1960-cı illərin casus serialı əsasında çəkilən "The Man from U.N.C.L.E." (2015), "King Arthur: Legend of the Sword" (2017) və Disney-in "Aladdin" (2019) cizgi filminin canlı aksiyon (bədii) uyarlaması daxildir. "Aladdin" dünya miqyasında 1 milyard dollardan çox gəlir əldə edərək 2019-cu ilin ən çox gəlir gətirən filmlərindən biri və kinematoqrafiya tarixində ən çox gəlir gətirən 34-cü film olub. 2020-ci ildə əsasən müsbət qarşılanan və kommersiya uğuru qazanan "The Gentlemen" (2019) ilə cinayət komediyası janrına geri qayıdıb. 2021-ci ildə isə "Wrath of Man" döyüş filmində Ceyson Stethemə rejissorluq edib.