Timothy Spall

Timoti Leonard Spoll (27 fevral 1957-ci il təvəllüdlü) ingilis aktyor və aparıcıdır. O, 1983-cü ildə ITV kanalında yayımlanan "Auf Wiedersehen, Pet" komediya-dram serialında Barri Spenser Teylor obrazını canlandırdıqdan sonra Böyük Britaniyada məşhurlaşmışdır. Spoll "Sirlər və yalanlar" (1996) filmindəki roluna görə BAFTA mükafatının "Ən yaxşı baş rol aktyoru" nominasiyasına layiq görülmüşdür. Daha sonra o, "Hamlet" (1996), "Hələ də dəli" (1998), "Nikolas Niklbi" (2002), "Sonuncu samuray" (2003), "Sehrlənmiş" (2007), "Suini Todd: Flit-stritin şeytan bərbəri" (2007), "Lənətlənmiş Yunayted" (2009), "Kralın nitqi" (2010), "Cincer və Roza" (2012), "İnkardan imtina" (2016) və "Ziyafət" (2017) kimi bir çox filmdə rol almışdır. O, "Toyuqların qaçışı" (2000) cizgi filmində kinayəli və kök siçovul Nik obrazını səsləndirmişdir. Aktyor "Harri Potter" filmlərinin beş hissəsində, "Azkaban məhbusu"ndan (2004) "Ölüm hədiyyələri: 1-ci hissə"yə (2010) qədər Piter Pettiqru obrazını canlandırmışdır. Spoll rejissor Mayk Li ilə əməkdaşlıq edərək altı filmdə rol almışdır: "Evim, şirin evim" (1982), "Həyat şirindir" (1990), "Sirlər və yalanlar" (1996), "Topsi-Tervi" (1999), "Hər şey və ya heç nə" (2002) və "Cənab Törner" (2014). Spoll sonuncu filmdəki C. M. U. Törner obrazı ilə böyük rəğbət qazanmış və 2014-cü ildə Kann Film Festivalında "Ən yaxşı aktyor" mükafatına layiq görülmüşdür. O, "Timoti Spoll: ...dənizdə" (2010–2012) adlı televiziya sənədli filmində çəkilmiş, 2019-cu ildə isə BBC-nin "Soyuq müharibə" dövründən bəhs edən 6 hissəli "Raketlər yayı" dramında Lord Artur Uollinqton obrazını canlandırmışdır.