Renée Zellweger

Renée Kathleen Zellweger (25 aprel 1969-cu il təvəllüdlü) amerikalı aktrisadır. İki "Oskar", iki "BAFTA" və dörd "Qızıl Qlobus" mükafatı da daxil olmaqla, müxtəlif mükafatların sahibi olan aktrisa 2007-ci ilə qədər dünyanın ən çox qazanan aktrisalarından biri idi. Texasda doğulub boya-başa çatan Zellweger, Texas Universitetində (Austin) ingilis ədəbiyyatı üzrə təhsil alıb. Əvvəlcə jurnalistika sahəsində karyera qurmağı hədəfləsə də, kollecdə oxuyarkən səhnədəki qısa təcrübəsindən sonra aktyorluğa maraq göstərib. "Dazed and Confused" (1993) və "Reality Bites" (1994) filmlərindəki kiçik rollardan sonra, o, ilk baş rolunu "Texas Chainsaw Massacre: The Next Generation" (1994) qorxu filmində canlandırıb. "Jerry Maguire" (1996) romantik komediyası, "One True Thing" (1998) dramı və "Nurse Betty" (2000) qara komediyasındakı baş rolları ilə məşhurlaşıb və sonuncu filmə görə "Qızıl Qlobus" mükafatına layiq görülüb. "Bridget Jones's Diary" (2001) romantik komediyasında Bridget Jones və "Chicago" (2002) müziklində Roxie Hart obrazlarını canlandırdığına görə Zellweger ardıcıl olaraq "Oskar"ın "Ən yaxşı qadın oyunçu" nominasiyasına namizəd göstərilib. O, "Cold Mountain" (2003) müharibə filmindəki çoxdanışan fermer rolu ilə "Oskar"ın "Ən yaxşı ikinci plan qadın oyunçu" mükafatını qazanıb. O, "Bridget Jones: The Edge of Reason" (2004) sikvelində və karyerasındakı durğunluq və fasilədən sonra "Bridget Jones's Baby" (2016) filmində Jones roluna qayıdıb. 2019-cu ildə Zellweger Netflix-in "What/If" serialında ilk böyük televiziya rolunu oynayıb və "Judy" bioqrafik filmində Judy Garland obrazını canlandıraraq "Oskar"ın "Ən yaxşı qadın oyunçu" mükafatını qazanıb. O, daha sonra NBC-nin "The Thing About Pam" (2022) kriminal mini-serialında Pam Hupp rolunda çəkilib.