David Gleeson

1942-ci ildə ilk kinoteatrlarını açan irlandiyalı kino sahibləri ailəsində dünyaya göz açan David Gleeson uşaqlıqdan kinematoqrafiya mühitində böyüyüb. Rəngarəng və müxtəlif bir yol keçən, o cümlədən Şimal Qütb dairəsinin dərinliklərində neft kəşfiyyatı sahəsində 5 il çalışan Gleeson, 2003-cü ildə çəkilən "Cowboys & Angels" filmi ilə ssenarist və rejissor kimi debüt edib. Doğulduğu Limerickdə (İrlandiya) cərəyan edən gənclik komediya-dramı "Cowboys & Angels" Buena Vista International (Disney) tərəfindən kinoteatrlarda nümayiş olunub. Film Newport Beach (ABŞ) kinofestivalında "Ən yaxşı ssenari" mükafatı və Giffoni (İtaliya) festivalında iki Qızıl Medal daxil olmaqla, səkkiz beynəlxalq kino mükafatı qazanıb. The New York Times qəzeti film haqqında "açıq fikirli intellektin və səmimi baxış bucağının təzə bir qarışığını təqdim edir" şərhini verərkən, The Chicago Tribune qəzeti "Cowboys" filmini Amerika studiyalarının gənclər üçün təqdim etdiyi əksər məhsullarla müqayisə edərək, onun qat-qat daha sanballı olduğunu qeyd edib. Gleesonun ssenarisini yazdığı və rejissorluq etdiyi növbəti filmi, 2006-cı ildə yenə Buena Vista Intl. vasitəsilə kinoteatrlarda nümayiş olunan "The Front Line" kriminal dramı olub. Variety jurnalı film haqqında yazıb: "Dublindəki konqolu qaçqından bəhs edən bu kriminal dram və geosiyasi düşüncə əsərinin uğurlu qarışığı olan [The Front Line] yüksək gərginliyi qoruyub saxlamaqla yanaşı, emosional təsir bağışlayır". The Sunday Independent (İrlandiya) isə qeyd edib: "Gleeson böyük ekranların nə üçün yaradıldığını bizə xatırladan möhtəşəm bir film ərsəyə gətirib və bu film böyük uğur qazanmağa layiqdir". 2008-ci ildə Gleeson zaman səyahəti mövzusunda yazdığı "The End of History" adlı elmi-fantastik ssenarisini Sony Pictures-ə satıb. O, növbəti on il ərzində Walt Disney Pictures, Fox Searchlight, Focus Features, 20th Century Fox, Mattel Studios və Paramount Pictures kimi studiyalar üçün bir neçə ssenari satışı və sifarişli işlərlə fəaliyyətini davam etdirib. 2017-ci ilin iyulunda Gleeson baş rollarda Stephen Dorff və Melissa George-un çəkildiyi "Don't Go" filminin ssenarisini yazıb və rejissorluğunu edib. "Don't Go" ABŞ-da 28 oktyabr 2018-ci ildə IFC Films vasitəsilə nümayiş olunub. 2019-cu ilin may ayında Fox Searchlight Pictures, "The Hobbit" və "The Lord of the Rings" əsərlərinin əfsanəvi müəllifi J. R. R. Tolkien haqqında Gleesonun orijinal ssenarisi əsasında hazırlanan və Chernin Entertainment-in istehsalı olan "Tolkien" filmini təqdim edib. Ssenarisini yazdığı və rejissorluq etdiyi, 2026-cı ildə nümayişi gözlənilən yarım-avtobioqrafik "Once Upon a Time in a Cinema" filmini yeni tamamlayan Gleeson, müxtəlif janrlarda işləməyə davam edir və hazırda "Violence, Foul Language and Scenes of a Sexual Nature" adlı musiqili komediyanın çəkilişöncəsi hazırlıq mərhələsindədir.