Jessica Chastain

Cessika Mişel Çesteyn (24 mart 1977-ci il təvəllüdlü) amerikalı aktrisa və kino prodüseridir. Feminist mövzulu filmlərdəki rolları ilə tanınan aktrisa "Oskar" və "Qızıl Qlobus" mükafatları da daxil olmaqla müxtəlif mükafatlara layiq görülüb, həmçinin iki dəfə Britaniya Film və Televiziya Sənətləri Akademiyası (BAFTA) mükafatına namizəd olub. "Time" jurnalı 2012-ci ildə onu dünyanın ən nüfuzlu 100 insanından biri seçib. Sakramento, Kaliforniyada doğulub boya-başa çatan Çesteyn erkən yaşlarından aktyorluğa maraq göstərib. 1998-ci ildə Şekspirin "Cülyetta" obrazı ilə peşəkar səhnə debütünü edib. Juilliard Məktəbində aktyorluq təhsili aldıqdan sonra televiziya prodüseri Con Uells ilə müqavilə imzalayıb. O, "Law & Order: Trial by Jury" də daxil olmaqla bir neçə televiziya serialında dövri qonaq aktrisa kimi çıxış edib. Həmçinin 2004-cü ildə Anton Çexovun "Albalı bağı" və 2006-cı ildə Oskar Uayldın "Salome" faciəsinin səhnə tamaşalarında rol alıb. Çesteyn kinodakı debütünü "Jolene" (2008) dramı ilə edib və "Take Shelter" (2011) və "The Tree of Life" (2011) dramlarındakı baş rolları ilə geniş şöhrət qazanıb. "The Help" (2011) filmindəki iddialı sosialit rolu ona "Oskar"ın "Ən yaxşı ikinci plan qadın roluna görə" nominasiyasını qazandırıb. 2012-ci ildə "Zero Dark Thirty" trillerində Mərkəzi Kəşfiyyat İdarəsinin analitiki roluna görə "Qızıl Qlobus" mükafatını qazanıb və "Oskar"ın "Ən yaxşı qadın roluna görə" nominasiyasına layiq görülüb. Elə həmin il Çesteyn Brodvey səhnəsində "The Heiress" tamaşasının yenidən səhnələşdirilməsində debüt edib. Onun ən çox gəlir gətirən filmləri "Interstellar" (2014), "The Martian" (2015) elmi-fantastik filmləri və "It Chapter Two" (2019) qorxu filmi olub. O, "A Most Violent Year" (2014), "Miss Sloane" (2016), "Molly's Game" (2017) və "The Good Nurse" (2022) dramlarındakı ifaları ilə tənqidçilərin rəğbətini qazanmağa davam edib. Prodüseri olduğu "The Eyes of Tammy Faye" (2021) bioqrafik filmində Temmi Fey obrazını canlandırdığı üçün Çesteyn "Oskar"ın "Ən yaxşı qadın roluna görə" mükafatını qazanıb. Televiziyada Çesteyn "Scenes from a Marriage" (2021) və "George & Tammy" (2022) dram mini-seriallarında baş rolları ifa edib. Sonuncu rola görə o, "SAG" mükafatına layiq görülüb. Bu ifası həmçinin ona "Emmi" və "Qızıl Qlobus" mükafatlarına namizədlik gətirib. Çesteyn kinoda müxtəlifliyi təşviq etmək üçün yaradılmış "Freckle Films" prodüser şirkətinin təsisçisidir. O, psixi sağlamlıq problemləri, habelə gender və irqi bərabərlik məsələlərində fəal mövqe tutur. Moda sahəsində çalışan rəhbər Can Luka Passi de Preposulo ilə evlidir və iki övladı var.