Jennifer Tilly

Cennifer Tilli (doğum adı Cennifer Ellen Çan; 16 sentyabr 1958) amerikalı aktrisa və poker oyunçusudur. O, daha çox "Child's Play" franşizasındakı (1998–) Tiffani Valentayn rolu ilə tanınır və bu rola görə qorxu filmləri dünyasında "ikon" hesab olunur. İlk diqqətçəkən aktyorluq işi 1984-cü ildə yayımlanan "Shaping Up" sitkomu olub, elə həmin il "No Small Affair" filmi ilə kinodebütünü edib. O, özünəməxsus səsi və komediya bacarığı ilə tanınır. Tilli "World Series of Poker" yarışmasının qadınlar kateqoriyasında qolbaq sahibidir və bu turnirdə qalib gələn ilk məşhurdur. O, aktrisa Meq Tillinin böyük bacısıdır. Tilli 1994-cü ildə Vudi Allenin "Bullets over Broadway" filmindəki Oliv Nil rolu ilə "Oskar" mükafatına namizəd olduqdan sonra şöhrət qazanıb. O, Vaçovskilərin 1996-cı il istehsalı olan "Bound" neo-noir trillerindəki ifası ilə daha çox rəğbət qazanıb və "Saturn" və "MTV" mükafatlarına namizəd göstərilib. Onun rol aldığı digər filmlər arasında "Let It Ride", "The Fabulous Baker Boys" (1989), "Made in America" (1993), "The Getaway" (1994), "Edie & Pen", "House Arrest" (1996), "Liar Liar" (1997), "Music from Another Room" (1998), "Stuart Little" (1999), "Dancing at the Blue Iguana" (2000), "The Cat's Meow", "Monsters, Inc." (2001), "The Haunted Mansion" (2003), "Home on the Range" (2004) və Terri Gilliamın "Tideland" (2005) filmləri var. O, həmçinin "Family Guy" (1999–indiyədək) animasiya serialında Bonni Svonson obrazını səsləndirməsi ilə tanınır. Tilli 1993-cü ildə "One Shoe Off" adlı Off-Brodvey tamaşasındakı ifasına görə "Theatre World" mükafatına layiq görülüb. Onun digər səhnə işləri arasında Brodveyin "The Women" (2001) və "Don't Dress for Dinner" (2012) tamaşalarının yenidən səhnələşdirilməsi yer alır.