Tim McGraw

Samuel Timothy "Tim" McGraw (1 may 1967-ci il təvəllüdlü) amerikalı kantri müğənnisi və aktyordur. Onun bir çox albom və sinqlları kantri musiqi hit-paradlarında zirvəyə yüksələrək, ümumi albom satışının 40 milyonu keçməsinə səbəb olmuşdur. O, kantri müğənnisi Faith Hill ilə evlidir və keçmiş beysbolçu Tug McGraw-un oğludur. Onun ardıcıl 11 albomu Billboard albom hit-paradlarında debüt edərək birinci yerə çıxıb. İyirmi bir sinqlı Billboard Hot Country Songs hit-paradında 1-ci yerə yüksəlib. O, 3 Qremmi, 14 Academy of Country Music mükafatı, 11 Country Music Association (CMA) mükafatı, 10 American Music Awards və 3 People's Choice Awards mükafatı qazanıb. Həyat yoldaşı Faith Hill ilə birlikdə çıxdığı Soul2Soul II turu kantri musiqi tarixində ən çox gəlir gətirən, bütün musiqi janrları arasında isə ilk beşliyə daxil olan turdur. O, aktyorluq sahəsində də fəaliyyət göstərib; "The Blind Side" (Sandra Bullock ilə), "Friday Night Lights", "The Kingdom" və "Four Christmases" (Vince Vaughn və Reese Witherspoon ilə) filmlərində ikinci dərəcəli rollarda, "Flicka" (2006) və "Country Strong" (2010) filmlərində isə baş rollarda çəkilib. O, Arena Futbol Liqasının "Nashville Kats" komandasının azlıq payına sahib olan sahiblərindən biri olub. Taylor Swift-in debüt sinqlı olan "Tim McGraw" mahnısı ona və onun "Can't Tell Me Nothin'" mahnısına istinad edir. Babasının italyan köklərinə hörmət əlaməti olaraq, 2004-cü ildə Milli İtalyan-Amerikan Fondu (NIAF) tərəfindən mükafatlandırılıb və Fondun 29-cu ildönümü qalasında Musiqi sahəsində NIAF Xüsusi Nailiyyət Mükafatını alıb.