Makoto Shinkai (Şinkay)

Makoto Niitsu (yaxud Makoto Şinkay kimi tanınan) yapon animasiya rejissoru, yazıçısı və manqa rəssamıdır. Şinkay karyerasına 1996-cı ildə "Nihon Falcom" şirkətində videooyun animatoru kimi başlayıb və 1999-cu ildə yayımlanan orijinal video animasiya (OVA) "Qız və pişiyi" ilə kinorejissor kimi tanınıb. "CoMix Wave Films" ilə uzunmüddətli əməkdaşlığa başlayan Şinkay 2002-ci ildə elmi-fantastik OVA olan "Ulduzun səsi"ni, ardınca isə ilk tammetrajlı filmi "Qüllənin sirri: Söz verdiyimiz yer"i (2004) çəkib. Şinkayın ikinci tammetrajlı filmi olan romantik dram antologiyası "Saniyədə beş santimetr" (2007) tənqidçilər tərəfindən yüksək qiymətləndirilib; eyni şəkildə onun sonrakı filmləri – dram janrındakı "İtirilmiş səslərin ardınca" (2011) və "Sözlər bağı" (2013) da böyük rəğbət qazanıb. Şinkayın 2016-cı il istehsalı olan fantastik romantik filmi "Sənin adın" həm tənqidçilər, həm də kommersiya baxımından böyük uğur qazanaraq bütün zamanların ən çox gəlir gətirən üçüncü anime filmi olub. 2019-cu il istehsalı olan "Yağışda səninlə" filmi də oxşar tənqidi və kommersiya uğurunu təkrarlayıb. Yeddinci filmi olan "Suzume" isə 2022-ci ilin noyabrında Yaponiyada nümayiş olunub.