Betty White

Betti Marion Uayt Ludden (17 yanvar 1922 – 31 dekabr 2021) amerikalı aktrisa və komediya ustası olub. O, 80 il davam edən karyerası ilə televiziya tarixində ən uzun müddət fəaliyyət göstərən şoumen kimi tanınır. Televiziya sahəsinin pionerlərindən biri hesab olunan Uayt, həm kamera qarşısında, həm də kamera arxasında idarəetməni ələ alan ilk qadınlardan biri olub. O, sitkom (Life with Elizabeth) prodüseri olan ilk qadın kimi tanınır və bu nailiyyətinə görə 1955-ci ildə ona fəxri "Hollivud meri" titulu verilib. Uayt "The Mary Tyler Moore Show" (1973–77) serialında Syu Enn Nivens və "The Golden Girls" (1985–92) serialında Rouz Naylend obrazları ilə mükafatlara layiq görülüb. Amerika Yazıçılar Gildiyası hər iki sitkomu "Bütün zamanların ən yaxşı yazılmış 101 televiziya serialı" siyahısına daxil edib. O, həmçinin "Hot in Cleveland" (2010–15) serialında Elka Ostrovski obrazı ilə də məşhurlaşıb. "Password", "Match Game", "Hollywood Squares" və "The $25,000 Pyramid" kimi bir çox Amerika televiziya oyunlarının daimi qonağı olan Uayt "Oyun şoularının birinci xanımı" adlandırılıb. O, 1983-cü ildə "Just Men!" verilişinə görə "Görkəmli oyun şousu aparıcısı" kateqoriyasında Emmi mükafatı alan ilk qadın olub. Uayt, həmçinin "Boston Legal", "Mama's Family" və "Saturday Night Live" verilişlərindəki çıxışları ilə də tanınır. Uayt müxtəlif kateqoriyalarda səkkiz Emmi, üç Amerika Komediya mükafatı, üç Ekran Aktyorları Gildiyası mükafatı və bir Qremmi mükafatı qazanıb. Onun Hollivud Şöhrət Xiyabanında ulduzu var və o, Televiziya Şöhrət Zalına daxil edilib.