Octavia Spencer

Oktavia Lenora Spenser (25 may 1970-ci il təvəllüdlü) amerikalı aktrisadır. O, "Oskar", Britaniya Akademiyası Film Mükafatı və "Qızıl Qlobus" da daxil olmaqla bir çox mükafatlara layiq görülüb, həmçinin iki dəfə "Praymtaym Emmi" mükafatına namizəd olub. Spenser kino debütünü 1996-cı ildə çəkilmiş "A Time to Kill" dramında edib. On il ərzində film və televiziya layihələrində kiçik rollar aldıqdan sonra, onun üçün dönüş nöqtəsi 2011-ci ildə baş verib. Belə ki, o, 1960-cı illərin Amerikasında xidmətçi obrazını canlandırdığı "The Help" dram filmindəki roluna görə "Ən yaxşı ikinci plan qadın roluna görə Oskar" mükafatını qazanıb. Növbəti illərdə o, Rayan Kuqlerin "Fruitvale Station" (2013) bioqrafik filmindəki roluna görə "National Board of Review" mükafatına layiq görülüb, CBS kanalının "Mom" (2013–2015) sitkomunda dövri rol alıb və Fox kanalının "Red Band Society" (2014–2015) dram serialında baş rollardan birini ifa edib. Spenserin 1960-cı illərin Amerikasında yaşayan digər qaradərili qadın obrazları – "Hidden Figures" (2016) bioqrafik filmində Doroti Von və "The Shape of Water" (2017) fantastik filmində xadimə rolları ona ardıcıl olaraq iki dəfə "Ən yaxşı ikinci plan qadın roluna görə Oskar" mükafatına namizədlik qazandırıb. Bununla o, bu uğura imza atan ilk qaradərili aktrisa, həmçinin mükafat qazandıqdan sonra iki dəfə namizəd göstərilən ilk və bu günə qədər yeganə aktrisa olub. O, daha sonra "The Divergent Series" (2015–16), "The Shack" (2017), "Gifted" (2017), "Instant Family" (2018), "Luce" (2019), "Ma" (2019), "Onward" (2020) və "Spirited" (2022) filmlərində rol alıb. O, Apple TV+ kanalının "Truth Be Told" (2019–2023) dram serialında baş rolu ifa edib. Spenser Netflix-in "Self Made" (2020) mini-serialında Madam Si Cey Uolker obrazını canlandırdığına görə "Məhdud serial və ya filmdə ən yaxşı baş rol qadın oyunçusu" nominasiyasında "Praymtaym Emmi" mükafatına namizəd olub. Yazıçı kimi Spenser "Randi Rhodes, Ninja Detective" uşaq kitabları seriyasının müəllifidir. O, bu seriyadan iki kitab nəşr etdirib: "The Case of the Time-Capsule Bandit" (2013) və "The Sweetest Heist in History" (2015).