Jon Hurwitz

Conatan Bencamin "Con" Hurvits (15 noyabr 1977-ci il təvəllüdlü) amerikalı ssenaristdir. O, Pensilvaniya Universitetinin Uorton Məktəbinin məzunu, həmçinin Rendolf Liseyinin keçmiş şagirdidir. Con Hurvits Heyden Şlossberqlə birlikdə "Harold & Kumar Go to White Castle" filminin ssenarisini yazıb, "Harold & Kumar Escape from Guantanamo Bay" filminin isə ssenari müəllifi və rejissoru olub. Onlar ilk dəfə Nyu-Cersi ştatının Rendolf şəhərindəki liseydə tanış olub dostlaşıblar və hələ universitetin son kursunda oxuyarkən ilk ssenariləri olan "Filthy"-ni MGM şirkətinə satıblar. Hurvits Pensilvaniya Universitetinin Uorton Biznes Məktəbində maliyyə, Şlossberq isə Çikaqo Universitetində tarix ixtisası üzrə təhsil alırdı və hər ikisi hüquq fakültəsinə daxil olmağı planlaşdırırdı. "Filthy" ssenarisini satdıqdan sonra onlar əyləncə sənayesində karyeralarına başlamaq üçün Hollivuda köçüblər. Hurvits və Şlossberqin növbəti layihəsi ssenarisini yazıb rejissorluq edəcəkləri "American Pie" franşizasının yenidən işlənilməsidir. Bundan əlavə, onların hazırlıq mərhələsində olan bir neçə layihəsi var: Paramount Pictures üçün ssenarisini yazdıqları "Grandma vs. Grandma" və Montecito Pictures ilə birlikdə prodüserliyini etdikləri "21 Shots" filmi.