Tessa Thompson

Tessa Thompson 3 oktyabr 1983-cü ildə ABŞ-ın Kaliforniya ştatının Los-Anceles şəhərində anadan olub. Atası afro-panamalı, anası isə meksikalı və Britaniya adaları əsillidir. O, Nyu-Yorkun Bruklin bölgəsinə köçməzdən əvvəl Los-Ancelesdə böyüyüb. Bir çox teatr tamaşalarında iştirak etdiyi Santa Monika Liseyində təhsil alıb. Məzun olduqdan sonra mədəniyyət antropologiyası üzrə dərəcə aldığı Santa Monika Kollecinə daxil olub. Tessa Thompson 2003-cü ildə Kaliforniyanın Pasadena şəhərindəki Boston Court Teatrında Uilyam Şekspirin "Fırtına" tamaşasında rol alıb. Elə həmin il "Romeo və Cülyetta" tamaşasında canlandırdığı Cülyetta obrazı ilə NAACP Teatr mükafatına namizəd olub. Tessa Thompson 2005-ci ildə CBS kanalının "Cold Case" serialı ilə ekran karyerasına başlayıb. 2010-cu ildə Amerikanın tanınmış afrikaəsilli qadın aktrisalarını bir araya gətirən "For Colored Girls" filmində yer alıb. 2012-2013-cü illər mövsümündə "666 Park Avenue" və "Copper" seriallarında əsas obrazları canlandırıb. 2016-cı ildə Amerikanın HBO telekanalında yayımlanan "Westworld" serialında Şarlotta Heyl obrazını oynayıb. Serialda Evan Reyçel Vud, Tendi Nyuton, Entoni Hopkins, Ed Harris və Ceffri Rayt kimi aktyorlarla birlikdə rol alıb. 2017-ci il istehsalı olan "Thor: Ragnarok" filmində Valkyrie rolunu oynayan Thompson, Marvel kainatının sonrakı filmlərində də eyni obrazla tamaşaçı qarşısına çıxıb. "Thor: Ragnarok" (Thor 3) filmində Kris Hemsvort, Keyt Blanşett, Mark Ruffalo, Tom Hiddlston, Karl Urban, İdris Elba, Entoni Hopkins, Rey Stivenson, Ceff Qoldblum, Sem Nil, Ken Vatanabe və Benedikt Kamberbetç ilə birlikdə rol alıb. 2018-ci ildə "İlin yüksələn aktrisası" kateqoriyasında BAFTA mükafatına namizəd göstərilib. 2019-cu ildə əvvəlki hissələrində Uill Smit və Tommi Li Consun rol aldığı "Men in Black: International" filminin baş rollarını bu dəfə Kris Hemsvort və Tessa Thompson bölüşüb, həmçinin Liam Nison, Emma Thompson və Rebekka Ferqyuson da filmdə rol alıblar.