Carlos Ponce

Carlos Ponce Puerto-Rikolu aktyor, müğənni, bəstəkar və televiziya simasıdır. Ponce Puerto-Rikonun Santurce şəhərində anadan olub. Valideynləri Carlos Ponce, Sr. və Esther Freyre Fidel Castro rəhbərliyindəki Kuba inqilabından sonra Kubadan mühacirət etmişdilər. Onun doğulmasından sonra ailə Humacao şəhərinə köçüb və Ponce burada böyüyüb. Uşaq vaxtı məktəbin tamaşalarında fəal iştirak edir, evdə isə tez-tez ailəsi üçün ən son mahnıları oxuyaraq kiçik çıxışlar edirdi. Puerto-Rikoda “Carlitos” kimi tanınan Ponce altı yaşında televiziya reklamlarında çəkilməyə başlayıb. O, Humacaoda orta məktəbdə oxuyub və məktəbin dram dərnəyinin üzvü olub. 1986-cı ildə Ponce ailəsi Florida ştatının Mayami şəhərinə köçüb və Ponce məktəbinin tamaşalarında iştirakını davam etdirib. O, ABŞ-ın cənub bölgəsində ən yaxşı şagird aktyor seçilib. 1990-cı ildə Ponce Cənub-Şərqi Teatr Konfransında iştirak edib və təqaüd qazanmaq uğrunda müsabiqəyə qatılıb. O, qalib gəlib və New World School of the Arts konservatoriyasına qəbul olunub. Lakin ispandilli televiziya kanalı Univision Ponceyə Hablando (“Danışırıq”) adlı verilişə aparıcılıq etməyi təklif edib. Bu, onun televiziyada ilk ciddi debütü olub və debütündən sonra universitetdəki təhsilini yarımçıq qoyub.