Halit Ergenç

1970-ci ildə İstanbulda anadan olub. Babası musiqiçi və aktyor Mehmet Sait Ergenç, anası isə İnci Aliye Yüceışıkdır. Anası alban mənşəlidir. Orta məktəb illərində mahnı oxumağa başlayan Ergenç təhsilini Beşiktaş Atatürk Liseyində başa vurub. Ali təhsilinə İstanbul Texniki Universitetinin Gəmiqayırma və Dəniz Elmləri fakültəsində başlayıb. Bu universitetdəki təhsilini yarımçıq qoyan Ergenç Mimar Sinan Gözəl Sənətlər Universitetinin Dövlət Konservatoriyasının Opera və Musiqili Teatr Aktyorluğu ixtisasını bitirib.[3] Üç il ərzində Ajda Pekkan və Leman Samın vokalisti olub. 1996-cı ildə Dormen Teatrında Kral və mən müziklində baş rolu canlandırıb. Həmin dövrdə serial aktyorluğuna da başlayan Ergenç Kara Melek serialında “Kürşat” rolunu oynayıb. Teatr fəaliyyətini Sevgilime Göz Kulak Ol, Arapsaçı, Popcorn, Bugün Git Yarın Gel tamaşaları ilə davam etdirib. Televiziya karyerasını Ölümün El Yazısı və Hiç Yoktan Aşk televiziya filmləri, eləcə də Böyle mi Olacaktı, Dedem, Gofret ve Ben və Esir Şehrin İnsanları serialları ilə davam etdirib. Zerda serialındakı “Devran” və Aliye serialındakı “Sinan Karahan” rolları ilə tanınıb. Rekord sayda izlənən Binbir Gece televiziya serialında baş rolu Bergüzar Korellə bölüşüb. Bu serialdakı roluna görə 2006-cı ildə 34-cü Altın Kelebek mükafatlandırma mərasimində Ən yaxşı kişi aktyor mükafatını qazanıb. Ergenç Muhteşem Yüzyıl serialında “Qanuni Sultan Süleyman” obrazını canlandırdığı performansına görə ikinci dəfə Ən yaxşı kişi aktyor nominasiyasında Altın Kelebek mükafatına layiq görülüb. Vatanım Sensin serialında “Miralay Cevdet”, Babil serialında isə “İrfan” obrazını canlandırıb.