Данила Козловский

Danila Valeryeviç Kozlovski (rusca: Данила Валерьевич Козловский; 3 may 1985-ci il, Moskva) rus aktyoru və rejissorudur. Danila Kozlovskinin rejissor kimi debütü olan "Məşqçi" filmi 2018-ci ildə ekranlara çıxıb. Kozlovski Moskvada anadan olub. Anası Nadejda Zveniqorodskaya teatr aktrisası, atası Valeri Kozlovski isə Moskva Dövlət Universitetində marketinq və kütləvi kommunikasiyalar üzrə professor olub. O, üç qardaşın ikincisidir; Yeqor adlı böyük, İvan adlı kiçik qardaşı var. Kozlovski erkən yaşlarından rəqs və musiqi dərslərinə gedib, saksafon və altda çalmağı öyrənib. Uşaqlıq illərində intizam problemləri səbəbindən tez-tez məktəb dəyişib. O, böyük ekranda debütünü 1998-ci ildə Rusiyanın "Sadə həqiqətlər" serialında problemli altıncı sinif şagirdi Denis obrazı ilə edib. 2007-ci ildə akademiyanı bitirdikdən sonra Danila Kozlovski rəsmi olaraq Kiçik Dram Teatrının (Avropa Teatrı) heyətinə qəbul edilib. 2005-ci ildə o, ilk əhəmiyyətli film rolunu "Qarpastum" ekran əsərində alıb. Birinci Dünya müharibəsi dövründə cərəyan edən film, öz futbol stadionlarını tikmək istəyən iki qardaşın hekayəsindən bəhs edir. Kozlovski bu rola görə Rusiya Kino Tənqidçiləri Gildiyasının "Ağ fil" mükafatına layiq görülüb. Kozlovski 2008-ci ildə "Qara ovçular" filmindəki baş rolu ilə daha geniş şöhrət qazanıb. Kozlovski 2012-ci ildə çəkilən "Ruhsuz" filmində rol aldıqdan sonra Rusiyada çox tanınan bir simaya çevrilib. O, həyat və karyerasındakı prioritetlərini yenidən qiymətləndirməyə başlayan gənc və iddialı icraçı menecer Maks Andreyev obrazını canlandırıb. Film uğurlu olub və 13 milyon dollar gəlir əldə edib. O, "Ruhsuz" (2012) filminə görə "Ən yaxşı kino aktyoru" nominasiyasında Milli "Qızıl Qartal" mükafatını qazanıb. 2015-ci ildə filmin davamı çəkilib və o, bu rola görə "Nika" mükafatına layiq görülüb. Kozlovski Boris Akuninin romanı əsasında 2012-ci ildə çəkilmiş "Casus" filmində Yeqor Dorin rolunu oynayıb. 2013-cü ildə o, "Əfsanə № 17" idman dramında xokkeyçi Valeri Xarlamovu canlandırıb. Film tənqidçilər tərəfindən bəyənilib və 29,5 milyon dollar gəlir əldə edərək kassa uğuru qazanıb. Kozlovski ilk Hollivud filmində 2014-cü ildə rol alıb; o, "Vampirlər akademiyası" komediya-qorxu filmində Dimitri Belikov obrazını canlandırıb. 2016-cı ildə Kozlovski beş filmdə – "Status: nişanlı deyil" romantik komediyasında, "Hardkor Henri" elmi-fantastik döyüş filmində, "Cümə" komediyasında, "Ekipaj" fəlakət filmində və "Vikinq" tarixi döyüş filmində rol alıb. Adı çəkilən filmlər arasında ən populyarları 27 milyon dollar gəlirlə "Ekipaj" və 34 milyon dollar gəlirlə "Vikinq" olub. O, imperator II Nikolay ilə balerina Matilda Kşessinskayanın eşq hekayəsindən bəhs edən "Matilda" (2017) filmində qraf Vorontsov rolunu oynayıb. Dövlət Dumasının deputatı Natalya Poklonskayanın dini əsaslarla filmin qadağan edilməsi üçün kampaniya aparmasından sonra film mübahisələrə səbəb olub. Həmçinin 2017-ci ildə Kozlovskinin populyar Kanada tarixi dramı "Vikinqlər"in altıncı mövsümündə Novqorodlu Oleq obrazını canlandıracağı elan edilib. 2018-ci ildə Kozlovski "Dovlatov" filmində ikinci dərəcəli rolda çıxış edib. Yazıçı Sergey Dovlatov haqqında olan bu bioqrafik film 2018-ci ildə Berlinale festivalının müsabiqə proqramında təqdim olunub.