Mehmet Kurtuluş

Almaniyaya işləmək üçün köçən bir ailənin övladıdır. Özü kimi aktyor olan və Almaniyanın Sat.1 telekanalında yayımlanan "Lenßen & Partner" adlı polis serialında rol alan qardaşı Tekin Kurtuluş ilə birlikdə Almaniyanın Salzgitter şəhərində böyüyüb. 1989-cu ildə ilk teatr fəaliyyətlərinə Fredenberg qəsəbəsindəki məktəb teatrında başlayıb. 1991-ci ildə məzun olduqdan sonra həvəskar olaraq teatr çalışmalarını davam etdirib. 1993-cü ildə peşəkar səviyyəyə keçərək Braunschweig Dövlət Teatrında oynamağa başlayıb. 1995-ci ildə kino şəhəri Hamburqa gedərək daha böyük bir teatrda "Komödie am Winterhuder Fährhaus" adlı komediyada rol alıb. Həmin dövrdə məşhur alman aktrisası Evelyn Hamann tərəfindən kəşf edilərək "Episode" adlı televiziya serialında oynayıb. 1998-ci ildə Hamburqun özəl teatrı olan "Hamburger Kammerspiele"də olarkən türk əsilli alman rejissor Fatih Akın ilə tanış olub. Fatih Akın ona "Kurz und schmerzlos" (Qısa və Acısız) filmində baş rol verib. Gənc bir türkü canlandırdığı bu filmdən sonra ulduzu parlayıb. 2007-ci ilə qədər 20-yə yaxın filmdə rol alıb. Bu arada, 2007-ci ildə alman aktrisası Désirée Nosbusch ilə tanış olaraq evlənib.