Hilary Swank

Hilari Enn Suonk (30 iyul 1974-cü il təvəllüdlü) amerikalı aktrisa və kino prodüseridir. O, ilk dəfə 1992-ci ildə "Camp Wilder" televiziya serialındakı rolu ilə tanınmış və "Buffy the Vampire Slayer" (1992) filmində kiçik bir rolla kinodebütünü etmişdir. Daha sonra o, "The Karate Kid" franşizasının dördüncü hissəsi olan "The Next Karate Kid" (1994) filmində Culi Pirs və "Beverly Hills, 90210" serialının səkkizinci mövsümündə (1997–1998) Karli Reynolds obrazları ilə böyük uğur qazanmışdır. Suonk beynəlxalq aləmdə Kimberli Pirsın "Boys Don't Cry" (1999) filmində transseksual kişi Brendon Tina və Klint İstvudun "Million Dollar Baby" (2004) filmində boksçu olmağa çalışan Meggi Fitscerald rolları ilə tanınmışdır. Hər iki rolu tənqidçilər tərəfindən yüksək qiymətləndirilmiş və o, iki "Oskar", iki "Qızıl Qlobus", iki "Critics' Choice Movie Awards" və bir "Screen Actors Guild Award" daxil olmaqla çoxsaylı mükafatlara layiq görülmüşdür. 2005-ci ildə "Time" jurnalı onu dünyanın ən nüfuzlu 100 insanı siyahısına daxil etmişdir. Suonk sonralar prodüserlik fəaliyyətinə başlayaraq, özünün də rol aldığı "Amelia" (2009), "Conviction" (2010), "You're Not You" (2014) və "What They Had" (2018) filmlərini ərsəyə gətirmişdir. Onun digər diqqətçəkən işləri arasında "Iron Jawed Angels" (2004) televiziya filmi, eləcə də "Freedom Writers" (2007), "Logan Lucky" (2017), "The Hunt" (2020) və "Fatale" (2020) bədii filmləri yer alır.