Andrew Garfield

Endryu Rassell Qarfild (20 avqust 1983-cü il təvəllüdlü) ingilis və amerikalı aktyordur. O, superqəhrəman filmlərindən tutmuş müzikllərə və müstəqil filmlərə qədər müxtəlif janrlardakı işləri ilə tanınır. Onun mükafatları sırasına "Toni" mükafatı, Britaniya Akademiya Televiziya mükafatı və "Qızıl Qlobus" mükafatı daxildir; bundan əlavə, o, iki dəfə "Oskar", üç dəfə Britaniya Akademiya Film mükafatı, bir dəfə "Lourens Olivye" mükafatı və bir dəfə "Praymtaym Emmi" mükafatına namizəd göstərilib. "Time" jurnalı 2022-ci ildə onu dünyanın ən nüfuzlu 100 insanından biri elan edib. Qarfild aktyorluq karyerasına "Vest-End" səhnəsində və Britaniya televiziyasında başlayıb. Onun ilk böyük uğuru "Boy A" (2007) televiziya filmindəki yeniyetmə məhkum rolu, daha sonra isə Devid Finçerin "Sosial şəbəkə" (2010) filmindəki Eduardo Saverin obrazı olub. Qarfild Mark Uebbin "Hörümçək-adam" (2012–2014) filmlərində və "Marvel Kinematoqrafiya Kainatı"nın (MCU) "Hörümçək-adam: Evə yol yoxdur" (2021) filmində baş rolu canlandıraraq daha geniş şöhrət qazanıb. Qarfild müharibə dramı olan "Hacksaw Ridge" (2016) filmində Desmond Doss və "Tick, Tick... Boom!" (2021) müzikl-dramında Conatan Larson rollarına görə "Oskar"ın "Ən yaxşı aktyor" nominasiyasına layiq görülüb. Onun digər filmləri arasında "Never Let Me Go" (2010), "Silence" (2016), "Under the Silver Lake" (2018), "The Eyes of Tammy Faye" (2021) və "We Live in Time" (2024) var. Televiziyada o, "Under the Banner of Heaven" (2022) kriminal dram mini-serialında baş rolda çəkilib və bu rol ona "Praymtaym Emmi" mükafatının "Məhdud serialda ən yaxşı baş rol aktyoru" nominasiyasını qazandırıb. Səhnədə Qarfild Brodveydəki debütünü "Satıcının ölümü" (2012) tamaşasının yenidən səhnələşdirilməsində Biff Loman rolu ilə edib və bu rol ona "Toni" mükafatının "Pyesdə ən yaxşı ikinci plan aktyoru" nominasiyasını gətirib. "Angels in America" tamaşasının Vest-End və Brodvey versiyalarında Prayor Uolter obrazına görə o, "Lourens Olivye" mükafatının "Ən yaxşı aktyor" nominasiyasına namizəd olub. Daha sonra o, "Toni" mükafatının "Pyesdə ən yaxşı aktyor" mükafatını qazanıb.