Dylan McDermott

Dylan McDermott (doğum adı Mark Anthony McDermott; 26 oktyabr 1961), amerikalı aktyordur. O, hüquq draması serialı The Practice-də vəkil və hüquq bürosunun rəhbəri Bobby Donnell rolu ilə tanınır. Bu rol ona "Dram Seriallarında Ən Yaxşı Aktyor" kateqoriyasında Qızıl Qlobus mükafatı qazandırmış və Primetime Emmy mükafatlarında "Dram Seriallarında Ən Yaxşı Başrol Aktyoru" nominasiyasını gətirmişdir. McDermott, həmçinin FX-in qorxu antologiyası serialı American Horror Story-nin müvafiq olaraq Murder House, Asylum, Apocalypse və 1984 alt başlıqlarını daşıyan dörd mövsümündə (birinci, ikinci, səkkizinci və doqquzuncu) Ben Harmon, Johnny Morgan və Bruce obrazlarını canlandırması ilə tanınır. Aktyor bunlarla yanaşı, Law & Order: Special Victims Unit serialının spin-off-u olan Law & Order: Organized Crime-da narkotik cinayətkar dəstəsinin lideri Richard Wheatley-ni; TNT serialı Dark Blue-da leytenant Carter Shaw-u canlandırmış; CBS istehsalı olan qısamüddətli iki dram serialı Hostages və Stalker-da, habelə 1994-cü il istehsalı olan Miracle on 34th Street (34-cü küçədə möcüzə) filminin yenidən çəkilmiş versiyasında rol almışdır. 2022-ci ildə isə serialdan ayrılan Julian McMahon-ın yerinə yeni başrol olaraq FBI: Most Wanted heyətinə qatılmışdır.