Salma Hayek Pinault

Salma Valgarma Hayek Pinault meksikalı və amerikalı aktrisa və kino prodüseridir. O, karyerasına Meksikada "Teresa" (1989–1991) telenovelasında və "Midaq Alley" (1995) romantik dramında çəkilməklə başlayıb. Tezliklə o, "Desperado" (1995), "From Dusk Till Dawn" (1996), "Wild Wild West" (1999) və "Dogma" (1999) kimi filmlərdə rol alaraq Hollivudda öz yerini möhkəmləndirib. Hayekin həm də prodüseri olduğu "Frida" (2002) bioqrafik filmində rəssam Frida Kahlo obrazını canlandırması onu "Ən yaxşı qadın roluna görə" Oskar mükafatına namizəd göstərilən ilk meksikalı aktrisa edib. Sonrakı illərdə Hayek daha çox prodüserliyə diqqət yetirməklə yanaşı, "Once Upon a Time in Mexico" (2003), "After the Sunset" (2004) və "Bandidas" (2006) kimi döyüş janrında olan filmlərdə rol alıb. O, "Grown Ups" (2010), "Grown Ups 2" (2013) və "The Hitman's Bodyguard" (2017) komediyaları ilə daha böyük kommersiya uğuru qazanıb. O, "Puss in Boots" (2011), "Sausage Party" (2016) və "Puss in Boots: The Last Wish" (2022) animasiya filmlərində səsləndirmə edib. Həmçinin "Tale of Tales" (2015), "Beatriz at Dinner" (2017) və "House of Gucci" (2021) dramlarındakı ifası ilə tənqidçilərin rəğbətini qazanıb. O, Marvel Kinematoqrafiya Kainatının "Eternals" (2021) filmində Ajak obrazını canlandırıb ki, bu da onun ən çox gəlir gətirən canlı çəkilişli filmi olub. Hayekin televiziya sahəsindəki rejissorluq, prodüserlik və aktyorluq fəaliyyəti ona dörd dəfə Emmi mükafatına namizədlik qazandırıb. O, "The Maldonado Miracle" (2004) filmi ilə "Uşaqlar üçün xüsusi proqramda görkəmli rejissor işi" nominasiyasında Daytime Emmi mükafatını qazanıb. ABC telekanalının "Ugly Betty" (2006–2010) komediya-dram serialındakı işinə görə o, biri "Komediya serialında görkəmli qonaq aktrisa", digəri isə "Görkəmli komediya serialı" nominasiyasında olmaqla iki dəfə Praymtaym Emmi mükafatına namizəd göstərilib. O, həmçinin Showtime kanalının "In the Time of the Butterflies" (2001) filmində Minerva Mirabal obrazını canlandırıb və prodüserlik edib, eləcə də NBC-nin "30 Rock" (2009–2013) komediya serialında qonaq aktrisa kimi çıxış edib. İctimai xadim kimi Hayek müxtəlif media qurumları tərəfindən Hollivudun ən güclü və nüfuzlu latın əsilli aktrisalarından biri və dünyanın ən gözəl qadınlarından biri kimi qeyd edilib. "Time" jurnalı 2023-cü ildə onu dünyanın ən nüfuzlu 100 insanından biri seçib. 2021-ci ildə o, Hollivud Şöhrət Xiyabanında ulduzla təltif olunub. O, biznes maqnatı François-Henri Pinault ilə evlidir və onların bir qızı var.