Tom Hanks

Tomas Ceffri Henks (doğum: 9 iyul 1956), amerikalı aktyor və film prodüseridir. Həm komediya, həm də dram janrındakı rolları ilə tanınan Henks, dünya miqyasında ən populyar və ən çox tanınan kino ulduzlarından biri hesab olunur və geniş dairələr tərəfindən Amerika mədəniyyətinin ikonu kimi qəbul edilir. Henks, baş rollarını ifa etdiyi Splash (1984) və Big (1988) adlı komediya filmləri ilə məşhurlaşdı. Philadelphia (1993) filmində QİÇS xəstəsi olan homoseksual vəkil və Forrest Gump (1994) filmində orta səviyyədən aşağı zəkaya sahib gənc bir adamı canlandıraraq ardıcıl iki il "Ən yaxşı kişi aktyor" nominasiyasında Akademiya mükafatı qazandı. Henks rejissor Stiven Spilberq ilə beş filmdə əməkdaşlıq edib: Saving Private Ryan (1998), Catch Me If You Can (2002), The Terminal (2004), Bridge of Spies (2015) və The Post (2017). O, həmçinin rejissor, prodüser və ssenarist kimi çıxış etdiyi Band of Brothers (2001) adlı mini seriala da imza atıb. Henksin digər diqqət çəkən filmləri arasında romantik komediyalar Sleepless in Seattle (1993) və You've Got Mail (1998); dramlar Apollo 13 (1995), The Green Mile (1999), Cast Away (2000), Road to Perdition (2002) və Cloud Atlas (2012); bioqrafik dramlar Saving Mr. Banks (2013), Captain Phillips (2013), Sully (2016) və A Beautiful Day in the Neighborhood (2019) yer alır. O, həmçinin Robert Lenqdon film seriyasında baş qəhrəmanı canlandırıb və Toy Story film seriyasında Şerif Vudi obrazını səsləndirib.