Sterling Hayden

Sterling Walter Hayden (doğum adı Sterling Relyea Walter; 26 mart 1916 – 23 may 1986) amerikalı aktyor və yazıçı olub. O, 16 yaşında orta məktəbi yarımçıq qoyaraq şxuna tipli gəmidə matros kimi işə düzəlib. 22 yaşında gəmi kapitanı olub və öz gəmisini almaq üçün pula ehtiyacı olduğundan Nyu-Yorkda model kimi fəaliyyətə başlayıb. Burada Paramount Studios-un istedad ovçuları tərəfindən kəşf edilərək ona müqavilə təklif olunub. Sterling Hayden 1940 və 1950-ci illərdə filmlərdə yaraşıqlı, hündürboylu, sarışın və müsbət obrazları canlandıran, sonralar isə "Dr. Strangelove", "The Godfather", "Nine to Five" və "King of the Gypsies" kimi filmlərdə sərt və möhkəm xarakterli aktyora çevrilən bir sənətkar idi. O, 1941-ci ildə "Virginia" filmindəki debütündən 1982-ci ildəki "The Blue and the Gray" televiziya mini-serialına qədər 71 tammetrajlı film və televiziya layihəsində rol alıb. O, dənizə olan sonsuz marağından 1963-cü ildə qələmə aldığı "Wanderer" adlı avtobioqrafiyasında bəhs edib. 1970-ci ildə isə onun dəniz mövzusunda yazdığı 700 səhifəlik epik romanı "Voyage", "Book-of-the-Month Club" tərəfindən əsas əsərlərdən biri kimi seçilib. Sterling Hayden 1983-cü ildə Avropada öz barjında çəkilmiş "Pharos of Chaos" adlı alman sənədli filmində görünüb. Filmin böyük hissəsində onun alkoqolun təsirindən huşsuz vəziyyətdə olduğu, şərabla yanaşı həşişdən də istifadə etdiyi görünür. O, kamera qarşısında belə deyib: "Məni çaşdıran odur ki, mən o qədər də bədbəxt deyiləm. Bəs onda niyə içirəm, bilmirəm."