Brad Pitt

Uilyam Bredli Pitt (18 dekabr 1963; Şoni, Oklahoma, ABŞ) amerikalı aktyor və film prodüseridir. Rəhbərlik etdiyi "Plan B Entertainment" prodüser şirkəti ilə prodüser kimi bir "Oskar" və "Praymtaym Emmi" mükafatına, həmçinin aktyorluq fəaliyyətinə görə iki "Qızıl Qlobus" və bir "Oskar" mükafatı da daxil olmaqla bir çox mükafata layiq görülüb. Missuri Universitetinin jurnalistika fakültəsini bitirməsinə az qalmış, uzun müddətdir arzuladığı aktyorluq karyerasına başlamaq üçün ailəsinə Pasadena şəhərindəki bir İncəsənət Akademiyasında təhsil alacağını deyərək Hollivuda yollanıb. Bir müddət müxtəlif reklam çarxlarında toyuq kostyumu geyinmək və limuzin sürücülüyü kimi işlərdə çalışdıqdan sonra "Dallas" və "Another World" kimi seriallarda kiçik rollar almağa başlayıb. 1989-cu ildə "Cutting Class" adlı aşağı büdcəli bir ekran işində rol alaraq diqqət çəkib. Bundan iki il sonra "People" jurnalının ona "Dünyanın ən seksual kişisi" titulunu verməsinə səbəb olacaq "Thelma & Louise" filmindəki on beş dəqiqəlik rolu gəlib. Böyük büdcəli layihələrdə ilk baş rol çıxışlarını "A River Runs Through It" (1992) və "Legends of the Fall" (1994) dramları, eləcə də "Interview with the Vampire" (1994) qorxu filmi ilə edib. Cinayət trilleri olan "Seven" (1995) və elmi-fantastik "12 Monkeys" (1995) filmlərində tənqidçilərin rəğbətini qazanan performanslar nümayiş etdirib; "12 Monkeys" filmi ona "Ən yaxşı ikinci plan aktyoru" nominasiyasında "Qızıl Qlobus" mükafatı qazandırıb və "Oskar"a namizədliyini təmin edib. Pitt "Fight Club" (1999) kult filmi, eləcə də "Ocean's Eleven" (2001) soyğun filmi və onun davamları olan "Ocean's Twelve" (2004) və "Ocean's Thirteen" (2007) filmlərində rol alıb. Ən böyük kassa uğurlarını "Ocean's Eleven" (2001), "Troy" (2004), "Mr. & Mrs. Smith" (2005), "World War Z" (2013) və "Once Upon a Time in Hollywood" (2019) filmləri ilə qazanıb. "Once Upon a Time in Hollywood" filmindəki oyunu ona ikinci "Qızıl Qlobus" mükafatını və "Ən yaxşı ikinci plan aktyoru" nominasiyasında "Oskar" mükafatını qazandırıb. Pittin "Oskar"a namizəd olduğu digər performansları "The Curious Case of Benjamin Button" (2008) və "Moneyball" (2011) filmlərində olub. O, hər ikisi "Ən yaxşı film" nominasiyasında "Oskar" qazanan "The Departed" (2006) və "12 Years a Slave" (2013) filmlərinin prodüseri olub. O, həmçinin "Ən yaxşı film" nominasiyasında namizəd göstərilən "The Tree of Life" (2011), "Moneyball" (2011) və "The Big Short" (2015) filmlərinin də prodüseridir. İctimaiyyət tərəfindən tanınan bir sima kimi Pitt, Amerika əyləncə sənayesinin ən nüfuzlu və güclü şəxslərindən biri hesab olunur. Bir neçə il müxtəlif media qurumları tərəfindən dünyanın ən cazibədar kişisi seçilib və şəxsi həyatı mətbuatın əsas müzakirə mövzularından biri olub. 2000-ci ildən 2005-ci ilə qədər aktrisa Cennifer Eniston ilə evli olub; 2014-cü ildə aktrisa Ancelina Coli ilə evlənib, 2019-cu ildə isə qanuni olaraq ayrılıblar. Pitt və Colinin altı övladı var; onlardan biri Afrikadan, ikisi Asiyadan övladlığa götürülüb, digər üçü isə onların bioloji övladlarıdır.