Jeremy Strong

Ceremi Stronq (25 dekabr 1978-ci il təvəllüdlü) amerikalı aktyordur. Həm səhnədə, həm də ekranda canlandırdığı rollarda tətbiq etdiyi intensiv metod aktyorluğu üslubu ilə tanınan aktyor "Praymtaym Emmi", "Toni" və "Qızıl Qlobus" mükafatları da daxil olmaqla müxtəlif mükafatlara layiq görülüb, həmçinin "Oskar" və BAFTA mükafatlarına namizəd olub. 2022-ci ildə Stronq "Time" jurnalının dünyanın ən nüfuzlu 100 insanı siyahısına daxil edilib. Yel Universitetinin məzunu olan Stronq aktyorluq təhsilini Londondakı Kral Dramatik İncəsənət Akademiyasında və Çikaqodakı Steppenwolf Teatr Şirkətində davam etdirib. Onun ilk off-Brodvey çıxışı 2006-cı ildə Con Patrik Şenlinin "Defiance" pyesində narahat əsgər rolu olub. Brodvey debütü isə 2008-ci ildə Robert Boltun "A Man for All Seasons" pyesinin yeni tamaşasında Riçard Riç rolu ilə baş tutub. Elə həmin il "Humboldt County" komediya filmi ilə kinoda debüt edib. 2012-ci ildə çəkilən "Lincoln" və "Zero Dark Thirty" filmlərində kiçik rollar oynadıqdan sonra "Parkland" (2013) və "The Big Short" (2015) filmləri ilə ilkin tanınmağa başlayıb. Stronq beynəlxalq şöhrəti HBO-nun "Succession" (2018–2023) dram serialında canlandırdığı Kendal Roy obrazı ilə qazanıb və bu rola görə "Dram serialında ən yaxşı baş rol aktyoru" nominasiyasında "Praymtaym Emmi" mükafatına layiq görülüb. Stronq daha sonra "The Gentlemen" (2019), "The Trial of the Chicago 7" (2020) və "Armageddon Time" (2022) filmlərində rol alıb. 2024-cü ildə o, Henrik İbsenin "An Enemy of the People" pyesinin yeni tamaşasında kiçik bir şəhərdə vicdanlı həkimi canlandırmaq üçün Brodveyə qayıdıb və bu rola görə "Pyesdə ən yaxşı aktyor" nominasiyasında "Toni" mükafatını qazanıb. Elə həmin il Stronq "The Apprentice" filmindəki Roy Kon obrazı ilə tənqidçilərin rəğbətini qazanıb və bu rol ona BAFTA, "Qızıl Qlobus" və "Ən yaxşı ikinci plan aktyoru" nominasiyasında "Oskar" mükafatına namizədlik gətirib.