Betsy Russell

Elizabet "Betsi" Rassel (6 sentyabr 1963-cü il təvəllüdlü) amerikalı aktrisadır. O, daha çox "Private School" (1983), "Tomboy" (1985) filmlərindəki rolları və 2006-2010-cu illərdə "Saw" film seriyasının əsas personajlarından biri olan Cill Tak obrazı ilə tanınır. Rassel San-Dieqoda, Kaliforniyada anadan olub. O, Konstans (qızlıq soyadı Lerner) və birja analitiki Riçard Layon Rasselin qızı, jurnalist və pedaqoq Maks Lernerin nəvəsidir. Atası və ana tərəfdən babası yəhudi olub. Səkkiz yaşından aktrisa olmaq istəyən Rassel məktəb tamaşalarında çıxış etməyə başlayıb. Orta məktəbdə oxuyarkən yerli səviyyədə lentə alınan "Pepsi" reklamında rol alıb. 1981-ci ildə "Mission Bay" orta məktəbini bitirdikdən sonra Los-Ancelesə köçüb və ilk rolunu almazdan əvvəl aktyorluq dərsləri keçməyə başlayıb. O, Santa Monika Universitetində mənəvi psixologiya üzrə magistr dərəcəsi alıb və həmçinin həmin universitetin sertifikatlı hipnotizatoru və həyat koçudur. Rasselin ilk rolu 1982-ci ildə çəkilən "Let's Do It!" filmində olub. Həmin il o, "T. J. Hooker", "Family Ties" və "The Powers of Matthew Star" seriallarında rollar alıb. 1983-cü ildə Rassel "Private School" seks-komediyasında Cordan Li-Censen obrazı ilə məşhurlaşıb. "Avenging Angel" döyüş filminin çəkilişləri zamanı ona 1985-ci il istehsalı olan "Silverado" filmindəki rol üçün dinləmələrə qatılmaq təklif edilsə də, o, bundan imtina edib. Bir müsahibəsində o, belə deyib: "Hər şeyin bir səbəbi var. Həmişə inanmışam ki, əgər o rolu oynasaydım, karyeram fərqli olardı. Bunun daha yaxşı, yoxsa daha pis olacağını deyə bilmərəm. Mənim üçün hər şey əla keçdi". O, 1980-ci illərdə "Tomboy" komediyası və "Cheerleader Camp" qorxu filmi də daxil olmaqla bir sıra B kateqoriyalı filmlərdə rol alıb. Rassel həmçinin "The A-Team", "Murder, She Wrote", "1st & Ten" kimi televiziya seriallarında və "Tomboy" filmindəki tərəf müqabili Cerard Kristoferlə yenidən bir araya gəldiyi "Superboy" serialının bir epizodunda görünüb. Rassel Kaliforniyanın Malibu şəhərində yaşayır. 1988-ci ilin avqustunda Rassel Dik Van Pattenin oğlu, aktyor Vinsent Van Pattenlə nişanlanıb. Onlar doqquz ay sonra, 27 may 1989-cu ildə Şimali Hollivudda evləniblər. Toy mərasimi Van Pattenin atasının Şerman Ouksda yerləşən evində keçirilib və orada çoxlu sayda məşhur simalar iştirak edib. 2001-ci ildə boşanan cütlüyün Riçard Van Patten (mart 1993) və Vinsent Van Patten kiçik (3 sentyabr 1995) adlı iki oğlu var. Rassel daha əvvəl film prodüseri Mark Berqlə nişanlı olub. Aktyorluqdan qısa müddətli fasilədən sonra Rassel "Saw III" filmində Con Kremerin keçmiş həyat yoldaşı Cill Tak rolunda kiçik bir obrazla geri qayıdıb. O, seriyanın davamı olan "Saw IV", "Saw V", "Saw VI" və "Saw 3D" filmlərində də rol alıb. O, həmçinin 2010-cu il istehsalı olan "Chain Letter", "SyFy" kanalının "Mandrake" filmi və "My Trip Back to the Dark Side" filmində çəkilib.