Olivier Assayas

Olivier Assayas (fransızca: [ɔlivje asajas]; 25 yanvar 1955-ci il təvəllüdlü) fransız kinorejissoru, ssenarist və kino tənqidçisidir. Assayas yavaş templi tarixi dramlar, psixoloji trillerlər, neo-nuar və komediyalardan ibarət eklektik filmoqrafiyası ilə tanınır. O, beynəlxalq aktyor heyəti ilə fransız, ispan və ingilis dillərində filmlər çəkib. Kinematoqrafçı Jacques Rémy-nin oğlu olan Assayas karyerasına Cahiers du Cinéma jurnalında tənqidçi kimi başlayıb. Orada o, dünya kinosu və sonradan öz yaradıcılığına təsir göstərən müəllif rejissorlar haqqında yazılar yazıb. Bir neçə qısametrajlı film çəkən Assayas, 1986-cı ildə Disorder filmi ilə tammetrajlı debütünü edib. O, tammetrajlı filmlər çəkməyə davam edib və 1994-cü ildə ekranlaşdırdığı Cold Water filmi karyerasında dönüş nöqtəsi hesab olunur. Bu, onun Kann Film Festivalının Un Certain Regard bölməsində nümayiş olunan ilk filmi olub. Növbəti filmi olan Irma Vep (1996) də Kann festivalında nümayiş etdirilib, Sentimental Destinies (2000), Demonlover (2002) və Clean (2004) filmləri isə rəsmi olaraq Qızıl Palma budağı uğrunda mübarizə aparıb. 2006-cı ildə o, Paris, je t'aime (2006) antologiya filmi üçün qısametrajlı bir film çəkib. Assayas Summer Hours (2008), Clouds of Sils Maria (2014) və Personal Shopper (2016) dramları ilə böyük rəğbət qazanıb; sonuncu film ona Kann Film Festivalında "Ən yaxşı rejissor" mükafatını qazandırıb. O, həmçinin Non-Fiction (2018) komediyasını və Wasp Network (2019) casus trillerini də ekranlaşdırıb.