Francis Ford Coppola

Francis Ford Coppola (7 aprel 1939-cu il təvəllüdlü) amerikalı kinorejissordur. O, Hollivudun ən məşhur və nüfuzlu kinorejissorlarından biri kimi geniş şöhrət qazanıb. O, 1970-ci illərin əvvəllərində meydana çıxan və müasir kino sənayesinə meydan oxuyan qeyri-ənənəvi ideyaları ilə seçilən, tərkibində George Lucas, Martin Scorsese, Robert Altman, Woody Allen və William Friedkinin də olduğu "Yeni Hollivud" adlı rejissorlar qrupunun simvoluna çevrilmişdi. O, 1970-ci ildə "Patton" filminin ssenarisini həmmüəllif kimi yazaraq "Oskar" mükafatına layiq görülüb. Rejissor kimi şöhrəti 1972-ci ildə "The Godfather" filminin nümayişindən sonra daha da artıb. Film qanqster janrında çəkilən filmlərdə inqilab edərək həm tənqidçilər, həm də tamaşaçılar tərəfindən böyük rəğbətlə qarşılanıb. Üç "Oskar" mükafatı qazanan bu film, o cümlədən onun ikinci dəfə "Ən yaxşı uyğunlaşdırılmış ssenari" nominasiyasında qalib gəlməsi ilə nəticələnib və onun görkəmli amerikalı kinorejissorlardan biri kimi mövqeyini möhkəmləndirib. Coppola ardınca eyni dərəcədə uğurlu olan "The Godfather Part II" filmini çəkib; bu film "Ən yaxşı film" nominasiyasında "Oskar" qazanan ilk sikvel olub. Film sələfindən daha yüksək qiymətləndirilib və ona "Ən yaxşı uyğunlaşdırılmış ssenari", "Ən yaxşı rejissor" və "Ən yaxşı film" nominasiyalarında üç "Oskar" qazandırıb. Elə həmin il onun rejissoru, prodüseri və ssenari müəllifi olduğu "The Conversation" filmi işıq üzü görüb. Film 1974-cü ildə Kann Film Festivalında "Qızıl palma budağı" mükafatına layiq görülüb. Onun növbəti rejissorluq işi 1979-cu ildə çəkilən "Apocalypse Now" olub; bu film həm çəkiliş prosesinin uzun və problemli olması ilə yadda qalıb, həm də Vyetnam müharibəsini canlı və sərt şəkildə təsvir etdiyinə görə tənqidçilərin rəğbətini qazanıb. Film 1979-cu ildə Kann Film Festivalında onun ikinci "Qızıl palma budağı" mükafatını qazandırıb. Coppolanın 1980-ci və 1990-cı illərin əvvəllərindəki bəzi işləri tənqidçilər tərəfindən yüksək qiymətləndirilsə də, onun sonrakı yaradıcılığı 70-ci illərdəki filmlərinin qazandığı tənqidi və kommersiya uğuruna çatmayıb.