Rebecca Hall

Rebekka Mariya Holl (3 may 1982-ci il təvəllüdlü) ingilis aktrisası və kinorejissordur. O, ilk dəfə 10 yaşında, atası ser Piter Hollun rejissoru olduğu 1992-ci il istehsalı "The Camomile Lawn" televiziya adaptasiyasında ekranlarda görünüb. Peşəkar səhnə debütü isə 2002-ci ildə yenə atasının quruluş verdiyi "Mrs. Warren's Profession" tamaşası ilə baş tutub və bu rol ona "Ian Charleson" mükafatını qazandırıb. 2006-cı ildə "Starter for 10" filmindəki debütündən sonra Holl Kristofer Nolanın "The Prestige" trillerindəki rolu ilə böyük uğur qazanıb. 2008-ci ildə Vudi Allenin "Vicky Cristina Barcelona" romantik komediya-dramında Viki obrazını canlandırıb və bu rola görə "Qızıl Qlobus" mükafatının "Ən yaxşı aktrisa" nominasiyasına layiq görülüb. Holl daha sonra Ron Hovardın "Frost/Nixon" (2008) tarixi dramı, Ben Afflekin "The Town" (2010) cinayət dramı, "The Awakening" (2011) qorxu trilleri, "Iron Man 3" (2013) superqəhrəman filmi, "Transcendence" (2014) elmi-fantastik filmi, "The Gift" (2015) psixoloji trilleri, "The BFG" (2016) fentezi-macəra filmi, "Professor Marston and the Wonder Women" (2017) bioqrafik dramı və "Godzilla vs. Kong" (2021) monster filmi kimi bir çox ekran əsərində rol alıb. 2016-cı ildə Holl "Christine" bioqrafik dramında xəbər müxbiri Kristin Çabbak obrazını canlandırdığına görə tənqidçilərin rəğbətini qazanıb. O, rejissor kimi debütünü "Passing" (2021) filmi ilə edib və tənqidçilərdən yüksək qiymət alıb. Holl, həmçinin Britaniya televiziyasında bir sıra diqqətçəkən rollar ifa edib. O, 2009-cu ildə "Channel 4" kanalında yayımlanan "Red Riding: 1974" mini-serialındakı roluna görə Britaniya Televiziya Akademiyasının "Ən yaxşı ikinci plan aktrisası" mükafatını qazanıb. 2013-cü ildə isə "BBC Two" kanalının "Parade's End" serialındakı ifasına görə Britaniya Televiziya Akademiyasının "Ən yaxşı aktrisa" mükafatına namizəd göstərilib.