공유

Qon Yu (Hanqıl: 공유) Cənubi Koreyalı aktyordur. O, şou-biznesdəki karyerasına VJ kimi başlayıb, daha sonra məktəb dramları və filmlərindəki rolları ilə debüt edib, nəticədə "Hello My Teacher" və "One Fine Day" kimi praym-taym dramlarında baş rolları qazanıb. "The 1st Shop of Coffee Prince" romantik komediyasında kişi qiyafəsinə girən bir qıza aşiq olan kafe meneceri rolu onun dramlarda baş rol ifaçısı kimi mövqeyini möhkəmləndirib. Dramın populyarlığı onu regional ulduza çevirib. 2 illik məcburi hərbi xidməti başa vurduqdan sonra Qon Yu "Finding Mr Destiny" romantik komediyası və Cənubi Koreyanın xüsusi məktəblərindən birində eşitmə qüsurlu şagirdlərin heyət tərəfindən cinsi istismara məruz qalması ilə bağlı real hadisələrə əsaslanan kitabı oxuduqdan sonra şəxsən özünün təşəbbüsü ilə hazırladığı "Silenced" filmi ilə geri dönüş edib. 2013-cü ildə Qon "The Suspect" döyüş filmində Şimali Koreya agenti rolunu canlandırıb. Onun hərbi xidmətdən sonra televiziyaya dönüş etdiyi "Big" serialı isə o qədər də yaxşı qarşılanmayıb. Qon Koreya tamaşaçıları və brend sponsorları arasında populyarlığını qoruyub saxlasa da, 2016-cı ildə "Train to Busan" və "Age of Shadows" kimi kassada rekord qıran filmlər, həmçinin Koreya kabel televiziyasının ən çox izlənilən dramlarından biri olan "Goblin" ilə karyerasında bir növ intibah dövrü yaşayıb.