Murat Boz

Murat Boz türk müğənni və aktyordur. İlk və orta təhsilini doğulduğu yer olan Zonguldakın Karadeniz Ereğli rayonunda başa vurduqdan sonra İstanbula köçdü. 1999-cu ildə İstanbul Bilgi Universitetinə qəbul oldu, bu təhsil ocağını bitirdikdən sonra İstanbul Texniki Universitetində təhsilini davam etdirdi. Həmin illərdə, başda Tarkan olmaqla, bir çox müğənniyə vokal ifaçısı kimi dəstək verdi. Boz solo karyerasına 2006-cı ildə çıxardığı “Aşkı Bulamam Ben” sinqlı ilə başladı. Növbəti il ilk studiya albomu olan Maximum-u satışa çıxardı və debütünü yüksək qiymətləndirən çoxsaylı mükafatlar qazandı. Daha sonra Şans (2009), Aşklarım Büyük Benden (2011) və Janti (2016) albomları ilə karyerasını davam etdirdi. Bu albomlarda yer alan “Maximum”, “Uçurum”, “Para Yok”, “Özledim”, “Sallana Sallana” və “Adını Bilen Yazsın” mahnıları Türkiyənin Rəsmi Siyahısında ilk beşlikdə qərarlaşdığı halda, “Geri Dönüş Olsa”, “Kalamam Arkadaş” və “Janti” mahnıları zirvəyə yüksəldi. Müğənni musiqi karyerası ilə yanaşı, 2014-cü ildən aktyorluğa da diqqət yetirərək Hadi İnşallah (2014), Kardeşim Benim (2016), Dönerse Senindir (2016) və Öldür Beni Sevgilim (2019) filmlərində baş rollarda çəkildi. Piano, skripka, nağara və ney çala bilən Murat Boz musiqi karyerası ilə yanaşı, müxtəlif şirkətlərin reklam simasıdır və həmin şirkətlərin reklam çarxlarında rol alıb. O Ses Türkiye proqramının dörd münsifindən biridir və ilk mövsümün qalib iştirakçısının münsifi olub. Onun mükafatları arasında dörd Altın Kelebek mükafatı və iki Kral Müzik mükafatı var.