Füsun Demirel

Füsun Demirel 13 iyun 1958-ci ildə Ankarada dünyaya gəlib. Peruca Xarici Dillər Universiteti və Roma Dramatik İncəsənət Akademiyasının Teatr fakültəsini bitirən Füsun Demirel sənət həyatına 1980-ci ildə Almaniyanın Berlin Kollektiv Teatrında Vasıf Öngörenin yazıb quruluş verdiyi "Zengin Mutfağı" tamaşası ilə başlayıb. Çevre Teatrı, Dormen Teatrı, Devekuşu Kabare və Dostlar Teatrında çalışan Demirel 1984-cü ildə Atıf Yılmazın "Bir Yudum Sevgi" filmi ilə kamera qarşısına keçib. Xüsusilə "Züğürt Ağa", "Uçurtmayı Vurmasınlar" və "Büyük Adam Küçük Aşk" kimi filmlərdə, həmçinin "Sıdıka" və "Şaşıfelek Çıkmazı" kimi seriallardakı rolları ilə tanınan Füsun Demirel aktrisalıq fəaliyyəti ilə yanaşı, italyan, ingilis və alman dillərini mükəmməl bilir. Tərcüməçiliklə də məşğul olan Demirel Dario Fo və Franca Rameninin ümumilikdə 27 pyesini türk dilinə çevirib.