Hal Linden

Hal Linden (Harold Lipshitz adı ilə anadan olub; 20 mart 1931) amerikalı teatr və kino aktyoru, televiziya rejissoru və musiqiçidir. O, ən çox televiziya komediya serialı Barney Miller-də baş qəhrəmanı canlandırması ilə tanınır. Bu rola görə yeddi Primetime Emmy və üç Qızıl Qlobus mükafatına namizəd olub. Bronxda anadan olan Linden Charles Lipshitz və Frances Rosenin oğlu idi. Böyük qardaşı sonralar Ohayodakı Bowling Green State University-də musiqi professoru oldu. Musiqiyə marağı olan Hal yeniyetməlik dövrünün sonlarında klassik klarnet çalmağa başladı və mütəmadi olaraq simfonik orkestrlərlə çıxış etdi. Manhettendəki High School of Music and Art-ı bitirdikdən sonra Queens College-də musiqi təhsili aldı, daha sonra biznes üzrə təhsil almaq üçün City College-ə keçdi. Hal həmçinin rəqs orkestrində çıxış edir və Sammy Kaye-nin qastrol səfərinə qoşulmağa dəvət olunmuşdu. Lakin orduya çağırıldı və burada əsgərlər üçün mahnı oxuyub müxtəlif əyləncələr təşkil etdi. Bu təcrübə onda aktyorluğa maraq yaratdı. Ordudan tərxis olunduqdan sonra Nyu-Yorkdakı American Theatre Wing-ə daxil olaraq səs və dram sənəti üzrə təhsil aldı. Hal 1955-ci ildə rəqqasə Frances Martinlə tanış oldu. Onlar üç il sonra evləndilər və Frances ailə qurmaq üçün karyerasını dayandırdı. Halın Broadway-də ilk tamaşası Bells Are Ringing oldu; burada o, baş qəhrəman Jeff Moss-un dublyoru idi. 1960-cı illərdə Hal On a Clear Day You Can See Forever, Subways Are for Sleeping, The Apple Tree və The Pajama Game tamaşalarındakı rolları ilə musiqili teatr sahəsində daha çox uğur qazandı. O, The Rothschilds tamaşasındakı roluna görə 1971-ci ildə Tony mükafatını qazandı. Bu səhnə uğuru onun televiziya karyerasına yol açdı və nəticədə o, məşhur Barney Miller (1974) komediya serialında baş rolu canlandırdı. Serialın yayımlandığı hər il Emmy mükafatına namizəd göstərilən Hal geniş tamaşaçı kütləsinə tanındı. Bundan sonra o, Blacke's Magic (1986) və Jack's Place (1992) kimi daha az tanınan televiziya seriallarında çıxış etdi. Həmçinin A New Life (1988) və Out to Sea (1997) kimi filmlərdə ikinci dərəcəli rollar oynadı. Onun qarşısına I Do! I Do! və The Pajama Game kimi digər musiqili tamaşalarda baş rollar, eləcə də I'm Not Rappaport və The Sisters Rosenzweig əsərlərində dramatik rollar çıxdı. Hal klarnet ifaçısı kimi fəaliyyətini davam etdirərək musiqi qastrollarında da iştirak edib. O və həyat yoldaşı Frances asudə vaxtlarında qolf oynamağı çox sevirlər.