Trevor Howard

Trevor Howard (29 sentyabr 1913 – 7 yanvar 1988) britaniyalı aktyor idi. O, İngiltərənin Kent qraflığının Cliftonville şəhərində Mabel Grey (Wallace) və Arthur John Howardın ailəsində anadan olub. Clifton Kollecində (vəsiyyətnaməsində bu kollecə dram təqaüdü üçün böyük bir miras qoymuşdu) və Kral Dramatik İncəsənət Akademiyasında (RADA) təhsil alıb, İkinci Dünya müharibəsindən əvvəl bir neçə il London səhnəsində çıxış edib. İlk maaşlı işi 1934-cü ildə "Revolt in a Reformatory" tamaşasında olub, daha sonra 1935-ci ildə kiçik rollar almaq üçün RADA-nı tərk edib. Hərçənd onun Britaniya Ordusunun Kral Rabitə Korpusundakı cəsarətli hərbi xidməti haqqındakı hekayələr ona həm aktyor yoldaşları, həm də pərəstişkarları arasında böyük hörmət qazandırmışdı, lakin Dövlət Arxivində saxlanılan sənədlər onun əslində 1943-cü ildə psixi qeyri-sabitlik və "psixopatik şəxsiyyət" diaqnozu ilə Britaniya Ordusundan tərxis olunduğunu üzə çıxarıb. Terence Pettigrew-in 2001-ci ildə Peter Owen tərəfindən nəşr olunan aktyorun tərcümeyi-halında ortaya çıxan bu hekayə, əvvəlcə Howardın dul arvadı, aktrisa Helen Cherry tərəfindən təkzib edilmişdi. Daha sonra rəsmi sənədlərlə üzləşdikdə, o, Daily Telegraph qəzetinə (24 iyun 2001) bildirib ki, aktyorun anası onun "Hərbi Xaç" ordeni sahibi olduğunu iddia edirmiş. O, əlavə edib ki, Howardın şərəfli bir hərbi keçmişi var və "utanılacaq heç bir şeyi yoxdur".