Kevin Costner

Kevin Michael Costner 18 yanvar 1955-ci ildə ABŞ-ın Kaliforniya ştatının Linvud şəhərində dünyaya gəlib. California State Universitetində marketinq və maliyyə üzrə təhsil alarkən gizli şəkildə aktyorluq dərsləri almağa başlayıb. Məzun olduqdan sonra korporativ bir işdə çalışmağa başlasa da, təyyarə səyahəti zamanı aktyor Richard Burton ilə təsadüfi qarşılaşması və onunla etdiyi qısa söhbət Costnerin həyatını dəyişib və tamamilə aktyorluğa yönəlmək qərarına gəlməsinə səbəb olub. Aktyorluq karyerasının əvvəllərində kiçik rollarda yer alan Costnerin bəxti rejissor Lawrence Kasdanın onu "Silverado" (1985) vestern filmində çəkməsi ilə açılıb. Ardınca Brian De Palmanın rejissoru olduğu "Dokunulmazlar" (The Untouchables) (1987) filmində canlandırdığı Eliot Ness obrazı və elə həmin il rol aldığı "Çıkış Yok" (No Way Out) triller filmi ilə baş rol aktyoru statusuna yüksəlib. 1980-ci illərin sonu və 1990-cı illərin əvvəli Costnerin karyerasının zirvə dövrü olub. Sevvilən beysbol filmləri "Boğa Takımı" (Bull Durham) (1988) və "Düşler Tarlası" (Field of Dreams) (1989) ilə böyük rəğbət qazanıb. Lakin əsl böyük uğurunu həm rejissoru olduğu, həm prodüserliyini etdiyi, həm də baş rolunda oynadığı epik vestern filmi "Kurtlarla Dans" (Dances with Wolves) (1990) ilə yaşayıb. Film "Ən yaxşı film" və Costner üçün "Ən yaxşı rejissor" mükafatı da daxil olmaqla 7 nominasiyada Akademiya Mükafatı qazanıb (Costner həmçinin "Ən yaxşı kişi aktyor" nominasiyasında da namizəd idi). Bu zəfərdən sonra "Robin Hood: Hırsızlar Prensi" (1991), Oliver Stounun "JFK" (1991) və Whitney Houston ilə baş rolları paylaşdığı "The Bodyguard" (1992) kimi kassa hitləri ilə Hollivudun ən böyük ulduzlarından biri kimi mövqeyini möhkəmləndirib. 1990-cı illərin ortalarında "Su Dünyası" (Waterworld) (1995) və rejissorluğunu da etdiyi "Postacı" (The Postman) (1997) kimi yüksək büdcəli layihələrin kassada gözlənilən uğuru qazanmaması səbəbindən karyerasında çətin bir dövr yaşasa da, Costner işləməyə davam edib. "Aşkın Gücü" (Tin Cup) (1996) kimi idman filmləri və "13 Gün" (Thirteen Days) (2000) kimi trillerlərlə varlığını qoruyub saxlayıb. Rejissorluğa davam edərək tənqidçilər tərəfindən bəyənilən vestern filmi "Uzak Ülke"yə (Open Range) (2003) imza atıb. Sonrakı illərdə "Öfkenin Rengi" (The Upside of Anger) (2005), "Bay Brooks" (Mr. Brooks) (2007), Supermanin atası Jonathan Kent obrazını canlandırdığı "Man of Steel" (2013), "Gizli Sayılar" (Hidden Figures) (2016) və "Molly's Game" (2017) kimi müxtəlif filmlərdə rol alıb. Costner 2018-ci ildə başlayan və böyük populyarlıq qazanan Paramount Network serialı "Yellowstone"da canlandırdığı fermer John Dutton obrazı ilə karyerasında yeni bir zirvə yaşayıb. Bu rol ona 2023-cü ildə dram seriallarında "Ən yaxşı kişi aktyor" nominasiyasında "Qızıl Qlobus" mükafatını qazandırıb. Lakin öz rejissorluq layihələrinə köklənmək istədiyi üçün serialın 5-ci mövsümünün ilk yarısından sonra layihədən ayrılıb. Rejissorluğa olan ehtirasını davam etdirən Costner böyük əmək və investisiya tələb edən, çoxhissəli vestern dastanı "Horizon: An American Saga" layihəsini həyata keçirib. Kevin Costner canlandırdığı güclü, prinsipial və adətən Amerika arxetiplərini əks etdirən obrazları, xüsusilə vestern və idman filmləri ilə olan güclü bağı, rejissorluq uğurları və Hollivuddakı onilliklərə yayılan davamlı varlığı ilə kino tarixinin ən ikonik və hörmət edilən simalarından biridir.