Selen Soyder

Mükerrem Selen Soyder (26 dekabr 1986-cı ildə Alsancak, İzmir şəhərində anadan olub), Miss Turkey 2007 müsabiqəsinin qalibi, türk model və aktrisadır. Yanyadan köçmüş bir ailənin ilk və yeganə övladı olaraq 26 dekabr 1986-cı ildə İzmirin Alsancak rayonunda dünyaya gəlib. İbtidai, orta və tam orta təhsilini İzmir şəhərində alıb. İstanbul Bilgi Universitetinin Tarix fakültəsində təhsil alıb. 2006-cı ildə “Miss Model of Turkey” müsabiqəsində Türkiyənin ən yaxşı modeli seçilib və “Miss Bikini of The Universe” müsabiqəsində Çin Xalq Respublikasında Türkiyəni təmsil edib. Müsabiqədə birinci olan Selen Soyder Türkiyəyə “Ən yaxşı milli geyim mükafatı”nı da qazandırıb. 2007-ci ildə Star TV-nin təşkil etdiyi və 1200 nəfərin müraciət etdiyi Türkiyə Gözəllik Müsabiqəsi — Miss Turkey-də Türkiyənin gözəli seçilib və Miss World 2007 müsabiqəsində 106 ölkənin iştirak etdiyi yarışda Çinin Sanya adasında Türkiyəni təmsil edib. İlk beşliyə düşə bilməyib. 2007-ci ildə Vakko-nun modeli olub. Daha sonra dil təhsili almaq üçün Kanadaya gedən Soyder 2009-cu ildə Türkiyəyə qayıdıb. Atasının istəyi ilə aparıcılıq kursuna yazılıb və Star TV Ana Xəbər proqramında təcrübə keçməyə başlayıb. Uğur Dündar və Yılmaz Özdilin xəbər qrupunda yer alıb. Star TV-də qısa müddət xəbər aparıcılığı edən ulduz daha sonra Kapadokyada çəkilən Yer Gök Aşk serialına görə kanaldakı vəzifəsindən ayrılıb. 2010-cu ildə FOX kanalında yayımlanmağa başlayan Yer Gök Aşk serialında baş rolda oynayıb. Canlandırdığı Toprak obrazı ilə Lale Devri adlı seriala keçərək türk serialları tarixində bir ilkə imza atıb. 2013-cü ildə onun adına jurnal təsis edilib. Selenist jurnalı ilə adına ilk jurnal təsis edilən şəxs kimi tarixə düşüb. 2014-cü ildə Star TV-də yayımlanan Reaksiyon serialında Dr. Zeynep obrazını canlandıraraq İbrahim Çelikkol ilə baş rolda oynayıb. Miss Turkey 2014-də münsif üzvü olub. Uşaqlıq dostu Ali Kemal Güvenin yazdığı “Cahide Devekuşu'nun Açık Evliliği” adlı qısametrajlı filmdə rol alıb.