Julia Roberts

Culiya Fiona Roberts (28 oktyabr 1967-ci il təvəllüdlü) amerikalı aktrisadır. Müxtəlif janrlarda baş rolları ilə tanınan aktrisa "Oskar", "Britaniya Film Akademiyası" mükafatı və üç "Qızıl Qlobus" mükafatı da daxil olmaqla, bir çox mükafatlara layiq görülüb. O, dram, triller və müstəqil filmlərə keçməzdən əvvəl romantik komediyalarda və blokbasterlərdə cazibədar, tamaşaçıya yaxın obrazları canlandırması ilə məşhurlaşıb. "Mystic Pizza" (1988) və "Steel Magnolias" (1989) filmlərindəki ilk uğurlarından sonra Roberts "Pretty Woman" (1990), "My Best Friend's Wedding" (1997), "Notting Hill" (1999) və "Runaway Bride" (1999) romantik komediyaları ilə aparıcı aktrisa statusunu möhkəmləndirdi. Roberts "Erin Brockovich" (2000) bioqrafik dramında baş rolu canlandırdığına görə "Ən yaxşı qadın roluna görə" Oskar mükafatını qazanıb. Daha sonra o, "Ocean's Eleven" (2001), "Ocean's Twelve" (2004), "Charlie Wilson's War" (2007), "Valentine's Day" (2010), "Eat Pray Love" (2010), "August: Osage County" (2013), "Wonder" (2017), "Ticket to Paradise" (2022), "Leave the World Behind" (2023) və "After the Hunt" (2025) kimi filmlərdə rol alıb. Televiziyada o, "HBO"-nun "The Normal Heart" (2014) filmində QİÇS böhranı dövründə həkim rolunu canlandıraraq "Primetime Emmy" mükafatına namizəd olub, "Homecoming" (2018) serialının birinci mövsümündə sosial işçi rolunu oynayıb və "Starz" kanalının "Gaslit" (2022) siyasi mini-serialında Marta Mitçell obrazını canlandırıb. Roberts "Red Om Films" prodüser şirkətini idarə edir. O, bu şirkət vasitəsilə rol aldığı müxtəlif layihələrdə, eləcə də "American Girl" franşizasının ilk dörd filmində (2004–2008) icraçı prodüser kimi fəaliyyət göstərib. 2009-cu ildən bəri "Lancôme"-un qlobal səfiridir. O, 1990-cı illərin böyük hissəsində və 2000-ci illərin ilk yarısında dünyanın ən çox qazanan aktrisası olub. "People" jurnalı onu rekord sayda – beş dəfə dünyanın ən gözəl qadını seçib.