Holland Taylor

Holland Virginia Taylor (14 yanvar 1943-cü il təvəllüdlü) amerikalı aktrisadır. O, ABC kanalının "The Practice" (1998–2003) serialında hakim Roberta Kittleson rolu ilə 1999-cu ildə "Dram serialında ən yaxşı ikinci plan aktrisası" nominasiyasında "Primetime Emmy" mükafatına layiq görülüb. CBS kanalının "Two and a Half Men" (2003–15) komediya serialında canlandırdığı Evelyn Harper obrazına görə isə o, ümumilikdə dörd dəfə "Primetime Emmy" mükafatına namizəd göstərilib. Taylorun digər diqqətçəkən televiziya işlərinə "Bosom Buddies" (1980–82), "The Powers That Be" (1992–93) və "The Naked Truth" (1995–98) sitkomlarındakı baş rolları daxildir. O, həmçinin "All My Children" (1981–83) operasında Jill Ollinger, "The L Word" (2004–08) serialında Peggy Peabody və "Mr. Mercedes" (2017–19) serialında Ida Silver obrazlarını canlandırıb. 2020-ci ildə Netflix-in "Hollywood" mini-serialında Ellen Kincaid roluna görə tənqidçilərin rəğbətini qazanıb və səkkizinci dəfə "Primetime Emmy" mükafatına namizəd olub. Taylorun rol aldığı bədii filmlər arasında "Romancing the Stone" (1984) və onun davamı (1985), "Alice" (1990), "To Die For" (1995), "One Fine Day" (1996), "George of the Jungle" (1997), "The Truman Show" (1998), "Happy Accidents" (2000), "Keeping the Faith" (2000), "Legally Blonde" (2001), "The Wedding Date" (2005), "Baby Mama" (2008), "Gloria Bell" (2018), "Bill & Ted Face the Music" (2020) və "The Stand In" (2020) var. Taylor Ann Richardsın həyat və fəaliyyətindən bəhs edən "Ann" adlı mono-tamaşanın həm müəllifi, həm də baş rol ifaçısıdır. Bu işinə görə o, "Ən yaxşı aktrisa" kateqoriyasında "Tony" mükafatına namizəd göstərilib.