Christopher Lee

Ser Kristofer Frenk Karandini Li 27 mayıs 1922-ci ildə İngiltərənin London şəhərində dünyaya gəlib. O, italyan aristokrat köklərinə malik olan anası qrafinya Estelle Marie Carandini və İngiltərə ordusunda xidmət edən atası Geoffrey Trollope Leenin oğludur. İkinci Dünya müharibəsi illərində Kral Hərbi Hava Qüvvələrində (RAF) və kəşfiyyat zabiti kimi xidmət edən Li, müharibədən sonra aktyorluğa üz tutub. Lakin 1.96 metrlik boyu karyerasının əvvəllərində rejissorlar tərəfindən "çox uzun" hesab edildiyi üçün ona maneə yaradırdı. Təxminən on il ərzində kiçik rollarda çəkildikdən sonra onu kino tarixinin ən ikonik simalarından birinə çevirəcək Hammer Film Productions ilə işləməyə başladı. Leenin taleyi 1957-ci il istehsalı olan "Frankenstein'ın Laneti" (The Curse of Frankenstein) filmində Canavarı canlandırması ilə dəyişdi. Lakin onu dünya miqyasında qorxu ikonuna çevirən rol 1958-ci il istehsalı olan "Dracula" filmindəki qraf Drakula performansı oldu. Bram Stokerin əfsanəvi vampirini dəfələrlə canlandıran Li, zərif, lakin qorxuducu tərzi ilə obrazına dərinlik qatdı. Bu dövrdə ən yaxın dostu və tez-tez tərəf müqabili olan Peter Cushing ilə birlikdə qorxu kinosunun qızıl dövrünü müəyyən etdilər. "Mumya" (The Mummy) (1959) və "Rasputin: The Mad Monk" (1966) kimi filmlərdəki çıxışları ilə "pis adam" rollarının aranan siması oldu. Qorxu janrından kənara çıxmaq istəyən Li 1970-ci illərdə kult klassik sayılan "Gizemli Ada" (The Wicker Man) (1973) filmində Lord Summerisle rolu ilə karyerasının ən yaxşı performanslarından birini nümayiş etdirdi. O, həmçinin əmisi oğlu Ian Flemingin yaratdığı Ceyms Bond silsiləsinin "Altın Tabancalı Adam" (The Man with the Golden Gun) (1974) filmində Bondun düşməni Francisco Scaramanganı canlandırdı. Karyerası ərzində 250-dən çox filmdə rol alaraq Ginnesin Rekordlar Kitabına düşən Li, 1998-ci il istehsalı olan "Jinnah" filmində Pakistanın banisi Məhəmməd Əli Cinnahı canlandırdı və bu rolu karyerasının ən vacib işi kimi qiymətləndirdi. 2000-ci illərdə karyerasının ikinci baharını yaşayan Li nəhəng layihələr vasitəsilə yeni nəsil tamaşaçılarla görüşdü. Peter Jacksonun "Yüzüklerin Efendisi" (The Lord of the Rings) və "Hobbit" silsilələrində J.R.R. Tolkien ilə şəxsən tanış olan yeganə aktyor kimi sehrbaz Sarumanı canlandırdı. George Lucasın "Yıldız Savaşları" (Star Wars) öncül trilogiyasında (II və III epizod) Sith Lordu qraf Duku rolu ilə daha bir ikonik mənfi qəhrəmana həyat verdi. Bundan əlavə, rejissor Tim Burtonun sevimli aktyorlarından biri kimi "Hayalet Süvari" (Sleepy Hollow), "Charlie'nin Çikolata Fabrikası" və "Ölü Gelin" kimi filmlərdə yer aldı. İrəliləmiş yaşına baxmayaraq, hevi-metal musiqisinə olan həvəsi ilə albomlar çıxaran və 2009-cu ildə "Ser" titulu alan sənətkar incəsənət dünyasının ən hörmətli simalarından biri idi. Əfsanəvi aktyor 7 iyun 2015-ci ildə tənəffüs problemləri və ürək çatışmazlığı səbəbindən 93 yaşında vəfat edib.