Lily Collins

Lili Ceyn Kollinz (18 mart 1989-cu il təvəllüdlü) britaniyalı və amerikalı aktrisa və modeldir. Qilford, Surreydə anadan olan və Los-Ancelesdə böyüyən Kollinz ekran fəaliyyətinə iki yaşında BBC-nin "Growing Pains" komediya-dramında başlayıb. 2000-ci illərin sonlarında aktrisalıq və modelliklə daha mütəmadi məşğul olmağa başlayan Kollinz, 2009-cu ilin ən çox gəlir gətirən üçüncü filmi olan "The Blind Side" idman-dramındakı rolu ilə karyerasında böyük uğur qazanıb. O, bundan sonra "Priest" (2011) elmi-fantastik döyüş-qorxu, "Abduction" (2011) psixoloji döyüş-triller, "Mirror Mirror" (2012) fantastika, "The Mortal Instruments: City of Bones" (2013) şəhər fantastikası, eləcə də "Stuck in Love" (2012), "The English Teacher" (2013) və "Love, Rosie" (2014) müstəqil romantik komediya filmlərində baş rolları ifa edib. Kollinz "Rules Don't Apply" (2016) komediyasında canlandırdığı Marla Mabrey rolu ilə tənqidçilərin rəğbətini qazanıb və bu rol ona "Qızıl Qlobus" mükafatının "Ən yaxşı aktrisa – müzikl və ya komediya" nominasiyasını qazandırıb. O, həmçinin Netflix-in mübahisəli "To the Bone" (2017) dramında anoreksiyadan əziyyət çəkən gənc qız obrazı ilə də diqqət çəkib. Aktrisa bioqrafik filmlərdəki işləri ilə də tanınır: o, Netflix-in "Extremely Wicked, Shockingly Evil and Vile" (2019) dramında Liz Kendall, "Tolkien" (2019) filmində C.R.R. Tolkinin həyat yoldaşı Edit və 10 nominasiyada "Oskar"a namizəd göstərilən, tənqidçilər tərəfindən yüksək qiymətləndirilən "Mank" (2020) filmində Rita Aleksandr obrazlarını canlandırıb. Kollinz BBC-nin "Les Misérables" (2018–2019) mini-serialında Fantin obrazını oynayıb və 2020-ci ildən bəri Netflix-in "Emily in Paris" serialında Emili Kuper obrazını canlandırır. Bu rola görə o, "Qızıl Qlobus" mükafatının "Ən yaxşı aktrisa – televiziya serialı, müzikl və ya komediya" nominasiyasına layiq görülüb. O, yazıçılıq debütünü yeniyetməlik dövründə yaşadığı qidalanma pozğunluğu da daxil olmaqla, psixi sağlamlıq problemləri ilə mübarizəsindən bəhs etdiyi "Unfiltered: No Shame, No Regrets, Just Me" (2017) kitabı ilə edib.